Regione Sardegna
Su 5 de austu a is seti de meri in Santu Millanu Giuseppe Manias at a presentai Codici Estetici una mustra de Land Art de s’artista Ghigo Chalreo a incuru de Mauro Podda.
De su 5 a su 20 de austu in Biddanoa Truschedu, a canta a sa crèsia de Santu Millanu, at a fai a castiai is òperas de Guilherme (Ghigo) Chalréo. Nàsciu in Boston in su 1982 de babu e mamma brasilianus, imoi bivit in Sardìnnia. Est un’artista autodidata chi sufrit de autìsmu. Giai de pipieddu aiat mustrau interessu mannu po s’arti e imoi sa passioni sua dda mustrat po mesu de su ricamu.
In su 2014 at cumentzau a sperimentai sa Fiber Art, cun scaparronis e avantzus de arroba agataus in domu, a pustis at sceberau de impreai su pannolenci chi est diventau sa genia de arroba chi ddi praxit prus e chi sighit a ponni po fai is òperas suas sceberendi beni beni is coloris de ponni paris cun puntus ordinaus e pretzisus finas a candu ndi essit a campu su traballu chi teniat in conca de fai. Nci ponit ànima e corpus in su traballu suu chi podit durai pagus minutus o ora meda.
Candu arribat a acabbai s’òpera chi boliat fai nci dda ponit a unu chirru, no nda circat prus e est prontu a ndi cumentzai un’àtera de bellu nou. Su praxeri mannu suu dd’agatat fadendi su traballu.
Po connosci mellus s’artista e is òperas suas fait a intrai a sa pàgina FB https://it-it.facebook.com/guilhermechalreo
Po totu is informus e po si prenotai innantis fait a tzerriai a su nùmeru: 388 366 6200