Regione Sardegna
Su 28 de trìulas de su 2022 at a essi una dii de arregordai. Cun 412 votus a favori, nisciunu contràriu e unu chi s’est astènniu, su printzìpiu de insularidadi intrat in sa Costitutzioni italiana. Sa Càmera de is deputaus at nau ca eja a sa proposta de Lei costitutzionali de initziativa populari. A s’artìculu 119 de sa Costitutzioni imoi s’at a aciungi su comma: “La Repubblica riconosce le peculiarità delle Isole e promuove le misure necessarie a rimuovere gli svantaggi derivanti dall’insularità”.
No est tzertu una cosa de pagu contu su de arreconnosci is caraterìsticas spetzìficas de un’ìsula chi ndi essint a pillu po mori de sa positzioni geogràfica cosa sua, e su fai a manera chi totu is regionis siant che a pari cantu prus fait.
Una gherra chi- mancai immoi dònnia partidu si ndi aiat a bolli pigai is mèritus- in totu custus annus at fatu andai ainnantis e at cumbàtiu prus de is àterus su partidu de is Riformadoris Sardus gràtzias a su spatzau de s’Avocau Roberto Fròngia mortu in su mesi de nadali de su 2020.
“Amus cambiau su cursu de sa stòria” - At nau Michele Cossa, su Presidenti de sa Commissioni speciali po s’insularidadi e de su Comitau chi promovit s’insularidadi in sa Costitutzioni. E at aciuntu “Su Parlamentu at nau craru ca bolit arreconnosci is diritus de is ìsulas. Imoi su Stadu at a depi assigurai a sa Sardìnnia e a totu is ìsulas de Itàlia che pari diritus e sa possibilidadi de cumentzai unu caminu de cambiamentu po nci bogai is ostàculus chi finas a oi nd’ant firmau su svilupu”.
Su prus est fatu… ma su traballu mannu cumentzat pròpiu imoi po fai a manera chi su printzipiu de insularidadi intret in sa Costitutzioni in sa forma mellus chi fait po amelliorai sa cunditzioni de sa Sardìnnia. A pustis at a tocai a totu is sardus a fai balli e a sfrutai prus chi si podit is oportunidadis noas chi ant a nasci.
Est sa primu borta in sa stòria de sa Repùblica chi una lei de initziativa populari mudat sa Costitutzioni. Imoi su Stadu at a depi ponni in contu sa cunditzioni de insularidadi e totu su chi cumportat, circhendi de ponni arremèdiu a cussa diferèntzia/suferèntzia intra de is ìsulas e is àteras regionis italianas chi nc’est sempri stètia.