Regione Sardegna
Is simaghesus sunt giai totu prontus po afestai a Santu Atzei patronu de sa bidda. Su santu dd’afestant duas bortas a s’annu: in s’ierru s’ùrtimu domìnigu de gennàrgiu e in s’istadi su 19 de trìulas.
Cras a mangianu sa festa religiosa cumentzat a is 7.30 de mangianu cun sa primu missa, a is 10.30 sa prufessoni cun su Santu peri is bias de sa bidda e a is 11.00 sa missa manna in sa crèsia a issu intitulada. A s’acabbu de sa missa su comitau de sa festa at a fai unu cumbidu in sa Pratza de su Comunu.
Sa festa tzivili est cumentzada cenàbura passada cun d-una gara de poesia e at a sighiri finsas a su 19 de trìulas. Dd’ant cuncordada is fedalis de su “72 a manus de pari cun s’Amministratzioni comunali e cun s’agiudu de totu is tzitadinus.
Custu merii un’apuntamentu cun sa mùsica chi in medas fiant abetendi e de siguru no s’ant a perdi! A is 22.00 su cuntzertu de is The Kolors chi at a fai arribai a Simaghis genti meda de is biddas de a làcana e de prus atesu puru.
Cras a meri sa festa tzivili sighit cun Valentina Persia e sa mùsica de is Trial Band. A ora de mesunoti sa festa at a acabbai cun s’arroda e s’apuntamentu po totus at a essi a ocannu chi benit!