Unione dei Comuni della Bassa Valle del Tirso e del Grighine

Su comitau po sa festa de Santu Antinu, formau de is giòvanus de sa leva de s’otantaduus, a manus de pari cun sa Pro Loco de Ollasta e cun s’agiudu de s’Amministratzioni comunali, at cuncordau sa festa de Santu Antinu, de su 6 a su 9 de trìulas 2022.

Su 28 de làmpadas a merii, in sa crèsia de Santu Antinu, sunt cumentzadas is novenas chi acabant oi, su 6 de trìulas, sa dii de su bèspuru.

Giòbia 7 de trìulas, sa dii de sa festa, a is 10.30 s’at a fai sa prufessoni peri sa bidda, cun su santu, e sa missa manna in sa crèsia de Santu Sebastianu a is 11.00.

Cenàbura 8 de trìulas, a is 18.30, torrat a essiri sa prufessoni chi at a lompi a sa crèsia de Santu Antinu e innia si narat sa missa e aici acabat sa festa religiosa.

Sa festa tzivili cumentzat su 6 de trìulas a is 21.30 de merii e sighit finsas a sàbadu 9 de trìulas. Su Comitau at cuncordau una festa bella chi de seguru at a acuntentai e a spassiai a totus: a is giòvanus, a is prus pagu giòvanus e a is pipieddus!

In programma su 6 de trìulas, cumentzendi de is 21,30, gara de cantu a chiterra cun Bazzoni e Salis acumpangiaus de Alessandro Carta e a pustis su grupu folk A ballare.

Su 7 de trìulas a is 22.30 nci at a essi su cuntzertu de is TAZENDA.

Cenàbura 8 de trìulas, su spetàculu musicali de is Voglio volume, a pustis Dj Matrix e DANIJEEY ant a tirai finsas a mangianeddu.

Sàbadu 9 de trìulas, a is 19.00, giogus po pipius, mùsica e tzùcuru filau, a is 22.00 su spetàculu musicali de is Carovana Folk

Is piciocus de sa leva de s’82 torrant gràtzias de coru a totu sa bidda, a sa Pro Loco, a s’Amministratzioni comunali, a sa Consulta de is giòvanus, a su predi, a sa Cunfraria, a s’assòtziu de voluntàrius Ollastra soccorso, a is cadderis e a totu is sponsor ca cun s’agiudu issoru nci sunt arrennèscius a fai una festa bella ….augurendi a totus atrus annus mellus!