Unione dei Comuni della Bassa Valle del Tirso e del Grighine

In Siamanna nci fiat una lista sceti “Uniti per Siamanna” e no nci fiat de timi po is candidaus a is eletzionis comunalis de su 12 de làmpadas francu su quorum! Totu sa bidda est andada a votai e Franco Vellio Melas at bintu is eletzionis (422 votus vàlidus a suba de 436) e est su sìndigu nou de Siamanna. Paris a sa scuadra sua immoi est prontu a amministrai sa bidda e a traballai po dda fai cresci e po acostai sa polìtica a sa genti.

F.V. Melas est sìndigu de Siamanna po sa de cuatru bortas a vatu de pari gràtzias a sa dèroga fata po assegurai un’amministratzioni in is comunus prus piticus innui est sèmpiri prus dificultosu a agatai genti chi si bolit candidai.

In su giassu istitutzionali de su Comunu de Siamanna s’agatat publicau su manifestu cun totu is eletus chi ant a intrai in su Consillu Comunali nou.

In Zrofolliu is tzitadinus ant torrau a votai a pustis de 8 mesis de cummissariamentu. A is eletzionis de ocannu passau difatis non si fiat presentada peruna lista e su Comunu est stètiu afidau a unu cummissàriu esternu.

Immoi su Cummissàriu straordinàriu, Paolo Puddu, lassat logu a su sìndigu nou Pinucco Chelo chi at superau su quorum (431 votus vàlidus a suba de 458 tzitadinus chi ant votau).

Chelo chi at giai amministrau sa bidda po tres bortas a vatu de pari (de su 2006 a su 2021) est giai traballendi po parai fronti a is dificultadis acapiadas a sa mancàntzia de dipendentis comunalis e po megiorai is cunditzionis de sa bidda.

In su giassu istitutzionali de su Comunu de Zrofolliu s’agatat publicau su manifestu cun totu is eletus chi ant a intrai in su Consillu Comunali nou.