Regione Sardegna
Ddu at tempus finsas a sa primu dii de santuaini 2022 po pigai parti a sa de 5 editzionis de su prèmiu Kentzeboghes e nci mandai is progetus tzinematogràficus po fai film e documentàrius in is lìnguas de Sardìnnia e in is lìnguas italianas de minoria tuteladas de sa Lei 482/99.
Su cuncursu dd’at cuncordau s’Assòtziu culturali Babel e po ddoi pigai parti non si pagat nudda. Is progetus passant in manus de una giuria de espertus de su setori chi ndi sceberant tres e giaint tres prèmius in dinari: su prèmiu Kentzeboghes Sardegna, su prèmiu Kentzeboghes Italia e su prèmiu Kentzeboghes Rts (Ràdiu televisioni sarda). Is progetus tzinematogràficus premiaus depint essi mudaus in film a intru de un’annu.
Sa novidadi de ocannu est ca fait a pigai parti a su prèmiu finsas cun spot o videoclip musicalis giai prontus innui si chistionat in is limbas de minoria e alloglotas de Sardìnnia (sardu, aligheresu, catalanu, tabarchinu, gadduresu e tataresu) e in cussas de is minorias linguìsticas italianas.
Ddu at atras atividadis meda acapiadas a su prèmiu: laboratòrius de linguàgiu tzinematogràficu po is scolas mèdias e elementaris, atòbius didàticus cun registas, seminàrius de mùsica e de tzìnema cuncordaus a manus de pari cun su Cunservatòriu de Casteddu, laboratòrius de tzìnema chi fait a sighiri on line puru in su giassu www.babeltv.org.
Su Prèmiu Kentzeboghes in is annus est crèsciu e s’est cunfirmau una novidadi de importu mannu in su panorama tzinematogràficu de is lìnguas minoritàrias, intrendi (gràtzias a su traballu fatu paris cun sa Regione Sardìnnia e atrus entis pùblicus e privaus) in d-unu caminu chi bolit amparai su patrimòniu linguìsticu de is diferentis comunidadis. S’assòtziu culturali Babel traballat de annus meda po amanniai e afortiai sa reti internatzionali cun organizatzionis culturalis e istitutzionis pùblicas po promovi, a manus de pari, su tzìnema in is lìnguas de minoria arrespetendi su multilinguismu e is diritus de is minoràntzias.
Su Prèmiu Kentzeboghes ddu finantziat s’Assessorau regionali a sa Cultura e a s’Istrutzioni pùblica e sa Fondazione di Sardegna.
Totu is informus po pigai parti a su cuncursu s’agatant in su giassu Babeltv.org.
Po ligi su Bandu in sardu intra a https://drive.google.com/file/d/1CTEOXB9D4rJx9WXqGIcWQ3YZrztGLJ0p/view
Po ligi su Bandu in italianu intra a https://drive.google.com/file/d/1wfFOOVINd9-9e_U676GYX17l5ceH70SP/view