Regione Sardegna
Sunt duus is comunus chi faint parti de s’Unioni de sa Baddi Bàscia de su Tirsu e de su Grìghini innui domìnigu 12 de làmpadas si votat po fai su sìndigu e su Consillu Comunali nou: sunt Siamanna e Zrofolliu.
Sa situatzioni est diferenti in custus comunus. Me in Zrofolliu a is eletzionis de su 2021 no s’at presentau peruna lista e su comunu est stètiu cummissariau. Ocannu si torrat a votai. Ant presentau sceti una lista tzìvica, su candidau a sìndigu est su sìndigu bèciu Pinuccio Chelo chi at amministrau sa bidda sa primu borta de su 2006 a su 2011 e chi dd’at sighia a amministrai finsas a su 2021.
In Siamanna puru nc’est una lista sceti. Su sìndigu Velio Melas si torrat a candidai, po sa de cuatru bortas in vatu de pari, cun sa lista “Uniti per Siamanna”. Ddu podit fai gràtzias a sa dèroga fata po assegurai un’amministratzioni in is comunus prus piticus innui est sèmpiri prus dificultosu a agatai genti chi si bolit candidai.
Paris a Is eletzionis comunalis su 12 de làmpadas si votat po is 5 referendum abrogativus in contu de giustìtzia.
S’arregordat a is tzitadinus ca si votat sceti domìnigu de is 7.00 de mangianu a is 11.00 de noti.