Regione Sardegna
Su comitau de Santa Vitòria 2022 a manus de pari cun sa Pro Loco de Ollasta ant cuncordau po sàbadu 14 e domìnigu 15 de maju sa festa de Santa Vitòria.
Sàbadu merii a is 18.00 si portat sa Santa in prufessoni e a pustis si fait sa missa in sa cresiedda de Santa Severa.
In antighidadi sa festa de Santa Vitòria dda cuncordaiant is piciocus e po cussu ddi naraiant sa festa de is bagadius. Sa missa e sa prufessoni cun sa Santa s’est sèmpiri fata mancari cun su tempus cosas meda sunt mudadas finsas in sa manera de fai is festas.
Domìnigu a is 09.00 movit sa tziclupedalada cara a Siapicia e furriat a Ollasta a ora de prandi. Po nci pigai parti tocat a tenni assumancus 6 annus e a si nci sciri a intru de sàbadu 14 me in sa sea de sa Pro Loco, su tanti de pagai est 8 èurus po mallieta, paninu e una cosa a bufai.
A merii in Pratza de Europa s’ant a fai giogus traditzionalis po pipius e piciocheddus, un’estratzioni a prèmius e s’at a acabbai sa dii de festa cun sonus e ballus in pratza in cumpangia de su grupu folk Ballade ballade bois.
Su comitau e sa Pro Loco torrant gràtzias a is tzitadinus e a totus is chi ant giau una manu de agiudu po cuncordai sa festa, augurant bonu divertimentu a totus e atrus annus mellus!
Su programma cumpletu de sa festa fait a ddu ligi in sa pàgina FB de su comunu de Ollasta.