Regione Sardegna
Su 12 de làmpadas si votat po 5 Referendum abrogativus in contu de giustìtzia. Sa pròpiu dii, in Sardìnnia nci sunt finsas is votatzionis comunalis comenti in totu Itàlia. Sa data dd’at ufitzializada sa Giunta Regionali cun d-una delìbera chi at giai stabiliu ca, su 12 de làmpadas s’ant a fai is votatzionis amministrativas e s’at a torrai a votai su 26 de làmpadas innui nc’at a essi su ballotàgiu.
Aristanis e Ceraxius (Selargius) sunt is duas tzitadis prus mannas, chi tenint prus de 15 milla bividoris, chi andant a votai po sceberai su sìndigu e su Consillu comunali nou e innui podit essi finsas chi nci siat su ballotàgiu.
Sa Provìntzia de Aristanis est cussa cun su nùmeru prus mannu de comunus chi depint votai po fai su sìndigu e su Consillu comunali nou: sunt 19 biddas in totu.
S’at a votai in: Aidumajore, Ardaule, Boàtiri, Bauladu, Gonnacodina, Milis, Mogoredda, Mragaxori, Nureci, Aristanis, Sàgama, Sèdilo, Sèneghe, Siamanna, Terraba, Tinnura, Tresnuraghes, Uras e Zrofolliu.
Si votat in 16 biddas de sa Provìntzia de Tàtari puru, in 14 biddas de sa Sardìnnia de cabu de bàsciu, in 13 de sa Provìntzia de Nùgoro e in 3 de sa Tzitadi metropolitana de Casteddu.