Regione Sardegna
Custas diis passadas is studiantis de sa scola primària e segundària de Simaghis ant pigau parti a unu Consillu comunali speciali a posta po issus. Is piciocheddus ant tentu modu, po sa primu borta, de biri e de cumentzai a cumprendi ita bolit nai e comenti si fait a amministrai una bidda, cali est su ruolu de su Sìndigu, ita faint is Assessoris e is Consilleris de magioràntzia e de minoràntzia.
S’amministratzioni comunali de Simaghis est pensendi de ponni in pei su Consillu Comunali de is piciocheddus, una manera po cumentzai a fraigai sa cussèntzia polìtica e tzivili de is tzitadinus chi ant a essi is amministradoris de cras. Cun su Consillu Comunali de is piciocheddus, issus ant a tenni manera de si ponni in is pannus de is amministradoris, at a essi utilosu po totus a ascurtai is bideas issoru e a mandai a innantis, a manus de pari cun su Consillu de is mannus, fainas de importu po su beni de totu sa bidda.
Sa pròpiu dii, in sa riunioni de Consillu, est stètia aprovada finsas una motzioni po promovi sa cultura po andai a donai su sànguni. Unu piculeddu de unu progetu prus mannu “sul valore del dono” cumentzau in su mesi de nadali de su 2021 a manus de pari cun s’Istitutu cumprensivu, is assòtzius de voluntàrius de Simaghis e totu sa comunidadi manna.
Est stètia un’esperièntzia bella e de importu po totu is presentis: studiantis, maistus de scola e amministradoris. Unu atòbiu diaderus “speciali” chi, de seguru, no ant a scaresci luegus nen is mannus nen is piticus poita candu s’atòbiant a pari generatzionis diferentis, imparendi a s’ascurtai pari pari, ndi essint a pillu cosas mannas e ddo at sèmperi cosa de imparai a nou, po is unus e po is atrus.