Regione Sardegna
Is tzitadinus de unu cali si siat Stadu de s’Unioni Europea, residentis in Itàlia, chi bolint votai in is eletzionis comunalis o de sa tzircuscritzioni, depint presentai a su Sìndigu de su Comunu italianu de residèntzia una domanda po si nci scriri a sa lista eletorali “aciunta” chi pertocat cussa votatzioni, e chi s’at a aprontai in su Comunu a intru de sa de 5 diis a pustis de sa dii chi est stètiu apicau su manifestu cun sa cunvocatzioni de is comìtzius eletoralis.
In sa domanda tocat a scriri:
- sa tzitadinàntzia;
- sa residèntzia e s'indiritzu de su Stadu de orìgini;
- sa pregunta de essi scritu a s’anàgrafi de sa populatzioni residenti me in su comunu.
Is tzitadinus de s’Unioni Europea tenint su diritu a votai me in Itàlia po is eletzionis europeas puru. Finsas po cussu tocat a presentai a su Sìndigu de su Comunu italianu de residèntzia una domanda po si nci scriri a sa lista eletorali “aciunta” chi pertocat cussa votatzioni, lista chi s’at a aprontai in su Comunu a intru de 90 diis innantis de sa dii stabilia po is votatzionis.
In sa domanda tocat a decrarai:
- sa voluntadi de imperai su diritu a votai sceti in Itàlia;
- sa tzitadinàntzia;
- s'indiritzu de su comunu de residèntzia e de su Stadu de orìgini;
- de podi votai in su Stadu de orìgini;
- de non tenni perunu provedimentu giuditziàriu, penali o tzivili a càrrigu, chi cumportit, cunformas a sa lei de su Stadu de orìgini, de ai pèrdiu su diritu a votai;
S’iscritzioni in sa lista aciunta abarrat finsas a candu unu non domandat de si nci scancellai o finsas a chi non ddu scancellant de ufìtziu in is situatzionis previdias.
Po ligi s’avisu e ndi scarrigai su mòdulu de domanda fait a intrai a su giassu istitutzionali de su Comunu de Zrofolliu.