Regione Sardegna
A pustis de duus annus su Comunu de Ollasta, a manus de pari cun sa Pro Loco e cun s’agiudu de atrus assòtzius de sa bidda, torrat a cuncordai sa fiera de Santu Marcu, una de is fieras prus antigas e prus connotas a innui a dii de oi, aici comenti a primu, lompit genti meda e de dònnia giassu de Sardìnnia.
De su 1839 custa fiera est unu de is atòbius prus de importu po su setori zootècnicu, una manera po is siendas de s’ìsula de si fait a connosci, de biri, de comporai o de bendi pegus bellus e seletzionaus de bestiàmini, ainas de traballu e de nci passai una dii de festa in cumpangia.
Andendi in vatu de su tempus sa fiera est crèscia e cambiada e, sa dii innantis e cussa a vatu de sa fiera, si cuncordant finsas fainas de importu po fai a connosci totu su patrimòniu stòricu-archeològicu de sa bidda e is produtus tìpicus de su territòriu.
Ocannu de su 24 a su 26 de abrili s’ant a podi biri mostras fotogràficas e culturalis a incuru de s’assòtziu il quadrifoglio, nc’ant a essi bisitas a is cuatru crèsias de Ollasta e a is tumbas de sa crèsia de Santu Marcu (a incuru de sa Pro Loco e de is ghias de su progetu “Paesaggi della Bassa Valle del Tirso e del Grighine”), e no ant a mancai is sonus, ballus e spetàculus po mannus e giogus po is pipieddus.
Is prus devotus a su Santu ant a podi ascurtai sa missa sa dii de su bèspuru, o andai a sa prufessoni e a sa missa manna in sa crèsia de Santu Marcu su 25 de abrili a ora de is 10.00.
Totu su programma cumpletu fait a ddu ligi in sa pàgina facebook de su Comunu de Ollasta o in cussa de sa Pro Loco.
Po totu is informus: Comunu de Ollasta 0783.409000, e-mail: Questo indirizzo email è protetto dagli spambots. È necessario abilitare JavaScript per vederlo.