Regione Sardegna
Sunt cumentzaus su 5 de abrili in Àllai, e acabbaus custas diis passadas, is traballus de s’artista Gallesu Simon O' Rourke, famadu in totu su mundu, po aprontai sa scultura de linna “una mano tra cielo e terra”.
Su progetu est nàsciu po circai de sarvai cun s’arti, assumancus una de is duas matas mannas chi sunt in s’intrada de sa bidda e chi tocaiat a nci segai de fundu po non portai dannu a sa genti e a is cosas. De custu truncu s’artista nd’at bogau a campu una bella scultura de linna fata arrespetendi s’ambienti: una manu chi de terra si allònghiat cara a celu, posta a metadi caminu intra de su mundu de is cosas terrenas e su mundu spirituali. Unu progetu bellu e de importu chi at a essi unu sìmbulu po sa comunidadi allaesa e un’atrativa turìstica po su territòriu paris a cussas chi giai nci sunt: su CIMA (Museu Tzìvicu de Àllai), sa domu in sa mata, su progetu cun Matera 2019-2022 Capitali europea de sa cultura, sa candidadura de sa bidda po tenni sa tzertificatzioni internatzionali de su celu steddau “cosa sua” e po diventai una destinatzioni astroturìstica in Sardìnnia.
Cust’òpera dd’at bòfia s’Amministratzioni comunali de Àllai gràtzias a s’agiudu de sa Fondazione Sardegna, de s’agenzia regionali Fo.Re.Stas, de su Museu CIMA, de su Planetàriu de L’Unione Sarda, de su Cunsòrtziu Turìsticu sa Perda ‘e Iddocca, de is atividadis localis, totus semper prontus a promovi e a fraigai su svilupu de s’economia.
'Una mano tra cielo e terra' de pagas diis est giai diventada unu sìmbulu po sa comunidadi allaesa e un’atrativa turìstica ecosustenìbili in su territòriu. Cun cust’òpera sighit su caminu po avalorai sa bidda e su territòriu chi s’amministratzioni comunali e is tzitadinus ant cumentzau de tempus meda a immoi e chi est fendi cresci su nùmeru de is turistas chi lompint a Àllai e s’economia locali.
Po ndi sciri de prus de cust' òpera, de candu est cumentzada a candu est acabbada, fait a intrai a sa pàgina FB de su Comunu de Àllai.