Regione Sardegna
Su Comunu de Àllai, paris a s’assòtziu culturali Punti di vista e a s’assòtziu interculturali NUR, at cuncordau po domìnigu 10 de abrili 2022 me in Pratza de Santu Sidoru, de is dexi de mangianu, sa presentada de duus progetus de importu po totu is tzitadinus allaesus de ònnia edadi. Su primu “Tesori naturali da scoprire: il viaggio” est unu progetu po sensibilizai a s’arrespetu e a s’amparu de is valoris naturalis e ambientalis de su territòriu. Destinau a is pipius e piciocheddus allaesus, de is 6 a is 13 annus, e a una truma de antzianus, custu progetu s’at a fai in Àllai in cincu domìnigus cun atòbius a su mangianu po is piciocheddus sceti, a merii is antzianus e is piciocheddus s’ant a atobiai a pari po favoressi su cunfrontu cun generatzionis diferentis. Is atividadis de custu progetu ant a cumentzai giai sa pròpiu dii de sa presentada e ant a sighiri de is dexi de mangianu a is cuatru de merii.
Paris a custu progetu s’at a presentai finsas su de duus progetus a incuru de s’assòtziu interculturali NUR “I giovani, l’interculturalità e l’ambiente”.
Po is iscritzionis e po totu is informus fait a intrai a sa pàgina FB de su Comunu de Àllai o a pregontai in su museu CIMA.