Regione Sardegna
Sa ASL de Aristanis at fatu a sciri ca de su mesi chi intrat su Tzentru vatzinus de sa Ròdia, in Aristanis, at a aberri su martis, su mèrcuris e sa giòbia mangianu de is 09.00 a is 13.00 e in is pròpiu diis de is 15.00 a is 18.00 de merii.
Sa campànnia de vatzinadura est andada annantis, imoi si sighint a fai is de tres dosis po is piciocheddus de 12 annus e is vatzinus a is pipius de is 5 a is 11 annus. A custus pipieddus est òbrigu a ddus prenotai innantis intrendi a su giassu https://prenotazioni.vaccinicovid.gov.it; po is piciocheddus de 12 annus o prus invècias, fait a lompi in deretura a su tzentru sena perunu bisòngiu de prenotai, tocat a si portai avatu sa tèssera sanitària e, aiat a essi mellus, a nci portai is fògius de su cunsensu informau e sa scheda anamnèstica giai cumpilaus, chi fait a ndi scarrigai de su giassu de s’ATS www.asloristano.it/argomenti/vaccinazionecovid19.
Is chi tenint su sistema immunitàriu dèbili meda, po mori de maladias gravis, podint lompi a si fai fai sa de cuatru dosis si nci sunt passadas giai 120 diis de sa de tres.
Cussus chi tenint 18 annus, o prus, e no ant ancora fatu mancu una dosi de vatzinu podint andai a su Tzentru a dda fai. Imoi nc’est finsas a disponimentu unu vatzinu nou, su Novavax, e de custu fait a fai duas dosis sceti a pustis de 21 diis s’una de s’atra.