Regione Sardegna
S’Universidadi de Casteddu at cuncordau, oi a is cuatru de merii, unu cunvènniu in contu de sa crisi Ucraina chi fait a sighiri in direta streaming puru. Su cunvènniu est una de is fainas de #unica4ukraine, su programma de s’universidadi chi bolit circai de parai fronti a s’emergèntzia in Ucraina e de profundai is temas acapiaus a sa situatzioni de crisi internatzionali. At a essi unu momentu po si firmai a pensai e a circai de cumprendi mellus, cun professoris espertus, sa crisi in Ucraina de su puntu de vista stòricu, econòmicu, giurìdicu e geopolìticu.
“Riflessioni sulla crisi ucraina” est su tìtulu chi ant giau a su cunvènniu. At a cumentzai is traballus s’Arretori de s’Universidadi Francesco Mola e a pustis ant a fueddai unus cantus professoris de s’Universidadi de Casteddu. Su professori Aldo Berlinguer at a chistionai de “Sa crisi in Ucraina: unu dannu preannuntziau”, Massimo Tria de “Sa distrutzioni de sa stòria e de s’informatzioni in Russia”, Marco Siddi de “Gherra e crisi energètica in Europa”, Giorgio Giacinto de “Seguresa e cyberspazio: tecnologia, formatzioni e comunidadi”, Luigi Martino, professori de s’Universidadi de Firenze, at a chistionai de “Geopolìtica e dimensione cyber in is gherras de su de XXI sèculu”.
In su giassu istitutzionali de s’Universidadi de Casteddu s’agatant publicaus su manifesteddu de su cunvènniu, su link po sighiri sa direta streaming e totu is atras fainas chi s’Universidadi de Casteddu est cuncordendi in favori de s’Ucraina.
a.f.