Regione Sardegna
Dischente est su nòmini de su primu cursu de formatzioni in lìnia pensau po imparai su sardu. Fiat una de is fainas cuncordadas in su progetu “Limba sarda, limba de s’identidade, limba de su mundu” finantziau a sa Provìntzia de Aristanis e a is 73 comunus assotziaus, unus dexi annus a immoi. In su 2010 faiat a sighiri su cursu in sa retza, in deretura setzius in domu, cun comodidadi, in cali si siat dii e a cali si siat ora chi a unu ddi beniat a beni. A pustis de unu pagheddu de tempus de totu is letzionis de su cursu in lìnia ant pensau de ndi fai una publicatzioni in paperi, nd’ est essiu a campu unu traballu bellu meda e beni fatu. Immoi totu is interessaus, studiantis, tzitadinus cali si siat, maistus de scola, e apassionaus de lìngua sarda, podint pediri una còpia de s'òpera a s’Ufìtziu de sa lìngua sarda de sa Provìntzia de Aristanis, po dda tenni in domu a betada de manu. A chini dd’ agradat prus, fait a ndi scarrigai in deretura totu su cursu Dischente in PDF, oghinou fait a fai s’una e s’atra cosa puru, aici po fai cuntentus a totus in famìllia: a is chi tenint prus cunfiàntzia cun su paperi e a is chi sena de computer in manus non podint stai.
Chini est interessau a arrici Dischente in paperi depit compilai custu mòdulu e nci ddu torrai a mandai a s’indiritzu Questo indirizzo email è protetto dagli spambots. È necessario abilitare JavaScript per vederlo.. Invècias po ndi scarrigai s’òpera in PDF fait a intrai a innoi.
In prus de s’òpera Dischente, s’ufìtziu de sa lìngua sarda de sa Provìntzia de Aristanis ponit a disponimentu de totu is tzitadinus interessaus finsas atras publicatzionis essias in is annus passaus.
Innoi fait a castiai is lìburus e a ligi una pitica descritzioni po donniunu. Est un’ocasioni bella po dònnia tzitadinu po amanniai sa colletzioni in lìngua sarda de domu e.. poita no? Ndi aiant a podi aprofitai finsas is bibliotecas comunalis de sa provìntzia po amanniai is setzionis issoru in lìngua sarda.
Est pretzisu a nai ca, po nd’arritirai is lìburus, a pustis de ai fatu sa domanda, tocat a andai in deretura a s’ufìtziu de sa lìngua sarda abertu dònnia dii, de is 10.00 a is 13.00, de su lunis a sa cenàbura, me in is localis de s’Amministratzioni Provintziali de Aristanis, in bia Carboni, in su primu pranu.
Po totu is atrus informus fait a intrai a su giassu istitutzionali de sa Provìntzia, a sa setzioni Ufìtziu de sa limba sarda oghinou a tzerriai a su 0783.793347 o a scriri a s’indiritzu de posta eletrònica Questo indirizzo email è protetto dagli spambots. È necessario abilitare JavaScript per vederlo..
a.f.