Regione Sardegna
In agiumai totu is biddixeddas de Sardìnnia, a su noti candu s’ària est lìmpia, fait ancora a castiai su celu e a biri, cun spantu e prexiu mannu, sa luna e is steddus. Is espertus de su setori nci arrennescint a ndi piscai is steddus prus nòdidus e a agatai is costellatzionis; scint totu is nòminis de is steddus e is contus mitològicus de comenti est nàscia dònnia costellatzioni e nc’est artziada a celu.
A castiai is steddus e sa luna est sèmpiri unu spantu, sa bellesa issoru est una cosa in prus chi s’aciungit, de badas, a su paesàgiu e ddu fait prus bellu ancora, est una cosa chi aus sèmpiri connotu… E chini mai si ddu podiat crei ca una dii depiaus arribai a amparai e a defensai su celu puru?
A dii de oi me in is tzitadis e in is biddas prus mannas s’incuinamentu luminosu nc’at amantau totu e castiendi su celu no si biri agiumai prus nudda.
S’amministratzioni comunali de Àllai e totu sa comunidadi ant sèmpiri tentu a coru sa bellesa de sa bidda e s’arrespetu de s’ambienti po chi, unu cras, de totu custa bellesa ndi potzant gosai is levas noas puru.
Àllai est sa primu bidda de Sardìnnia chi at cumprèndiu ca oi est unu lussu finsas a nci arrennesci a biri is steddus in celu, un’ arrichesa manna chi est cumentzendi a essi sèmpiri prus rara. Aici (beni pensaus in Àllai!) ocannu passau, in consillu comunali ant deliberau de giai adesioni a sa “Decraratzioni po sa defensa de su celu noturnu e de su diritu a sa luxi de is steddus”, mellus connota comenti “Decraratzioni de La Palma de su 2007”, sa Carta mondiali po s’amparu de su celu a de noti sustènnia de s’UNESCO.
Gràtzias a is traballus fatus me in s’illuminatzioni pùblica a intru de sa bidda, in Àllai s’incuinamentu luminosu nc’est calau meda e in prus pagu de duus annus. Totu sa bidda at scumìtiu in s’astroturismu e at aderiu cun cuntentesa manna a custa faina. Àllai est abetendi sa tzertificatzioni po su celu “cosa sua” chi bolit defensai e fai a connosci in dònnia logu, est a canta de intrai in is destinatzionis turìsticas “starlight”e est aprontendi.sì po giai acasàgiu a totus is chi ant a lompi a sa bidda, po ddus fai gosai no sceti de is steddus de su celu ma de totu is bellesas stòricas, archeològicas e paesagìsticas chi nci sunt. Is fainas po fait a connosci su territòriu, su patrimòniu cosa sua e po avalorai su celu ant a essi medas e de diferenti genia. Su prexiu de sa bidda est crèsciu e is bideas puru! Su comunu at bintu finsas unu Bandu de sa Fondazione Sardegna. In is cidas imbenientis ant a collocai 3 panchinas mannas, de una forma stramba, me in is giassus prus bellus, a sa posta po castiai su celu. Àllai si preparat a custa genia noa de turismu cun sa spera chi potzat arribai genti meda e chi abarrit cuntenta de s’esperièntzia fata in custu logu!