Unione dei Comuni della Bassa Valle del Tirso e del Grighine

Sa Commissioni regionali po is Pari Oportunidadis de sa Regioni Sardìnnia est sighendi assustrada sa gherra in Ucràina.

“Seus a canta a su pòpulu ucrainu - aici ant nau is commissàrias- e su pensamentu nostu est poi s fèminas, mamas, fìllas, pipieddus e pipieddas chi in tempus de gherras sunt cussus chi ndi sufrint prus. Seus a canta a totu sa comunidadi Ucraina chi bivit in Sardìnnia, agiumai tres milla personis, su prus fèminas chi immoi sunt timendi e in pistighìngiu mannu po sa sorti de is familiaris issoru. Sa gherra non podit essi mai una manera po firmai is cuntèrrias internatzionalis. Sa spera est chi is natzionis fatzant totu su chi est in poderi issoru po chi custu arrori mannu acabit immediatu”.

Sunt medas diaderus in dònnia logu is initziativas de solidariedadi po su pòpulu ucrainu e po parai fronti a sa crisi militari e a cussa econòmica chi at a sighiri po mori de custa gherra.

In biddas meda de Sardìnnia, de cabu de susu a cabu e bàsciu, sunt cuncordendi manifestatzionis e fainas de importu po essi a canta a sa comunidadi ucraina e po giai una manu de agiudu in su chi fait.

In Aristanis is assòtzius de voluntàrius sunt arregollendi mexinas e atru materiali sanitàriu de nci mandai in Ucràina.

Su sìndigu de Terraba est arregollendi is adesionis de is tzitadinus, assòtzius e de chini totu in sa bidda est dispostu a arretzi is disterraus in domu sua.

In Arborea is consilleris de s’opositzioni ant presentau una motzioni a su Guvernu italianu po chi assegurit su prus impressi chi fait sa cunditzioni de disterraus a is tzitadinus ucrainus chi ddu pedint.

Su Consillu regionali at aprovau custas diis passadas un òrdini de sa dii po chi su Presidenti de sa Regioni Solinas si impenniet a domandit a su guvernu italianu de fai totu su chi tocat po firmai e parai fronti a manera pacìfica a su chi est sutzedendi e po nai ca nou a cali si siat genia de violèntzia contras a su pòpulu ucrainu. Po solidariedadi, su palatzu de su Consillu regionali de sa Sardìnnia at a essi illuminau in grogu e asulu, su colori de su trigu e de celu, is coloris de sa bandiera ucraina chi bolint nai paxi e abbundàntzia.