Regione Sardegna
Po promovi sa Sartìglia e ndi avalorai su patrimòniu stòricu e culturali cun is artis, sa Fondazione Oristano at pensau a Emozioni di Sartiglia, unu cuncursu dedicau a sa poesia e a su disènniu. Ocannu a su cuncursu s’at aciuntu una setzioni noa puru: Sartiglia Comics totu dedicada a su fumetu.
Su Cuncursu de poesia, abertu a totu is autoris chi ant fatu is 18 annus, est partziu in duas setzionis: poesia in lìngua italiana e poesia in lìngua sarda.
Donniunu podit pigai parti a su cuncursu mandendi una poesia sceti e narendi a cali de is duas setzionis bolit pigai parti. Sa poesia tocat chi siat inèdita premiada in atrus cuncursus. A chini bincit ddi spetant 500 èurus. Sa commissioni podit giai finsas mentzionis spetzialis po is òperas chi no ant bintu ma sunt bellas su pròpiu.
Sa domanda po pigai parti a su cuncursu, paris a sa poesia, fait a dda mandai in sa posta a intru de su 30 de abrili 2022 (s’at a pigai in cunsideru su timbru postali) a sa Fondazione Oristano- Casella Postali 33 OR Centro- 09170 o in sa posta eletrònica a s’indiritzu Questo indirizzo email è protetto dagli spambots. È necessario abilitare JavaScript per vederlo., scriendi in s’ogetu Emozioni di Sartiglia 2022 - Cuncursu de Poesia e sa setzioni a innui si bolit pigai parti.
Su Cuncursu de disènniu est cuncordau a manus de pari cun s’Assessorau a s’Istrutzioni pùblica de su Comunu de Aristanis e pensau po totu is pipius e is piciocheddus de is scolas primàrias e segundàrias de primu gradu chi bolint aprontai unu disènniu cun sa tènnica chi ddis agradat prus (pastellus, pennarellus a cera, coloris a tèmpera, collage, atra genia de tènnicas). Su disènniu tocat a ddu fai in unu fògiu de paperi o de cartoncinu scriendi finsas totu is datus de chini dd’at fatu (nòmini, sangunau, scola chi frecuentat, edadi) a un’ala de su disènniu.
Is disènnius nci depint essi portaus a manus a intru de su 10 de martzu a su Museo Antiquarium Arborense in pratza Corrias. Is cidas a pustis de sa Sartìglia s’at a cuncordai una mustra virtuali cun totu is disènnius arribaus e a coa dònnia disènniu at a torrai a su meri suu.
Su Cuncursu artìsticu de fumetu “Sartiglia Comics” est organizau de sa Fondazione Oristano, a manus de pari cun s’Acadèmia de arti de Casteddu. Is chi bolint pigai parti depint cuncordai unu contigheddu piticu a fumetus, in biancu e nieddu o a coloris, in 4 tàulas, pensendi a sa Sartìglia o a unu fatu stòricu acontèssiu diaderus, o a cali si siat atra cosa chi pertocat sa manifestatzioni. No nci est perunu inditu po sa stòria, sa tènnica e su stili. Podint pigai parti a su cuncursu totu is fumetistas chi tenint prus de 14 annus. A intru de totu is òperas chi arribant si nd’ant a sceberai 10 (is autòris ant a essi abisaus cun d-una e-mail) chi ant a essi postas in una publicatzioni a incuru de sa Fondazione Oristano chi at a bessiri in su 2023. A intru de totu is fumetus lòmpius nd’ant a sceberai finsas unu chi at a binci comenti de prèmiu unu cuntratu cun sa domu de imprenta Camena, e sa stòria totu cumpleta (40 tàulas) at a girai in totu su territòriu natzionali.
Totu is òperas depint arribai a intru de su 26 de abrili 2022 a mesunoti. Po sa pre-seletzioni is òperas depint arribai in formau Jpeg a risolutzioni arta (300 dpi) a s’indiritzu Questo indirizzo email è protetto dagli spambots. È necessario abilitare JavaScript per vederlo..
Is 10 òperas chi ant a essi sceberadas invècias depint arribai in formau originali a s’indiritzu Accademia d’arte di Cagliari srl Piazzale Lazzaretto 1 - 09126 Cagliari, Questo indirizzo email è protetto dagli spambots. È necessario abilitare JavaScript per vederlo.
In su giassu de sa Fondazione Oristano s’agatat publicau s’arregulamentu de su cuncursu e totu su de scriri po ddoe pigai parti. Po is atrus informus fait a tzerriai a sa Fondazione Oristano, Tel. 0783/303159
o a scriri a Questo indirizzo email è protetto dagli spambots. È necessario abilitare JavaScript per vederlo.