Regione Sardegna
Sa Pro loco de Zrofolliu no si perdit de ànimu e in coru suu tenit sa spera chi sa sagra de s’aràngiu si potzat fai prus ainnantis. Sa sagra est una manifestatzioni importanti po Zrofolliu chi si fait giai de 23 annus e at fatu a connosci is produtus de sa bidda no in sa provìntzia de Aristanis sceti ma in logus meda de Sardìnnia.
Sa festa dda organizat sa Pro Loco chi s’incurat finsas de bendi s’aràngiu e totu is produtus genuinus fatus de cussu: licoris, durcis, marmelladas.
“Sa sagra s’est firmada sceti ocannu passau po mori de is restritzionis acapiadas a s’emergèntzia sanitària de sa Covid-19, aiat a essi bellu ocannu a nci arrennesci a dda torrai a cuncordai”. Aici at nau sa Presidenti de sa Pro Loco de Zrofolliu Rita Delogu.
No scideus ancora comenti at a essi sa situatzioni, speraus andendi e melliorendi sèmpiri! Auguraus a sa Pro Loco de Zrofolliu de nc’arrennesci a fai sa sagra e a totus is atrus, tzitadinus o assòtzius chi siant, de cuncordai su chi disìgiant lassendi.sì a palas custa esperièntzia mala.