Regione Sardegna
Oi est sa dii internatzionali de sa lìngua mama. De su 2000 custa dii (chi s’UNESCO at proclamau in su 1999 dii internatzionali) s’afestat su 21 de friàrgiu de dònnia annu in totu su mundu. S’intentu de custa dii est cussu de promovi e giai amparu a is lìnguas mamas, de favoressi su multilinguismu e sa diversidadi linguìstica chi rapresentat s'identidadi culturali de is pòpulus. Sa lìngua mama non fait a dda cambiai cun nisciuna atra lìngua, est sa lìngua de su coru, de is afetus, in cussa lìngua donniunu at imparau a connosci su mundu e a giai su nòmini a totu is cosas, a nai is sentimentus e is bisòngius suus, a intrai in cuntatu cun is atrus.
In custu tempus de globalizatzioni e de comunicatzioni digitali sunt medas is lìnguas chi arriscant de sparessi po sèmpiri. Candu morit una lìngua, si nci andant paris a issa oportunidadis, traditzionis, modus de nai chi no s’agatant in perunu atru logu, maneras de pensai, arregordus, fueddus chi sunt pèrdius po sèmpiri.
A gherrai po amparai una lìngua bolit nai finsas a promovi sa diversidadi linguistica e s’educatzioni cun prus lìnguas; bolit nai a pigai cussèntzia ca esistint lìnguas meda e ca donniuna de issas tenit unu valori mannu poita ca rapresentat sa cultura e s’identidadi de unu pòpulu e fait nasci in chini dda fueddat abilidadis cognitivas noas.
Nois sardus non si depeus scaresci ca sa lìngua nosta puru, cun is fueddus, is sonus, is gestus, sa musicalidadi sua fait parti de s’identidadi nosta, est una lìngua ùnica in totu su mundu, est sa cosa prus potenti chi nos permitit de fai cresci e svilupai su patrimòniu nostu. A connosci lìnguas meda est po totus un’arrichesa manna. A connosci su sardu puru est, po nois sardus, un’oportunidadi in prus!
Si a un’òmini ddu fueddas in una lìngua chi cumprendit, su chi ddi nas si frimat in sa conca.Si a un’òmini ddu fueddas in sa lìngua sua nci arribas in deretura a su coru. (Nelson Mandela)