Regione Sardegna
Si fait a sciri a is interessaus ca, sa Regione Sardìnnia cun D.G.R. n.50/44 de su 28.12.2021, “Pranus personalizaus in favori de is cun disabilidadi grai”, Lei 162/98, annu 2022; at autorizau a perlongai is progetus ativus, francu chi, po rinùntzia o morti de su benefitziàriu non finant innantis de su tempus, e at dispostu chi de su 1 de maju 2022 incumentzint cussus fatus a nou.
Po tenni su tempus de cuncordai totu is pranus personalizaus, a intru de su 28 de friàrgiu de su 2022 is interessaus depint aprontai e nci portai cumpilaus a s’ufìtziu de su Servìtziu Sotziali de su comunu totu custus documentus:
- sa domanda po arrici su benefìtziu;
- sa certificatzioni chi cumprovit sa cunditzioni de disabilidadi grae cunformas a s’art.3, comma 3 de sa Lei 104/92 fatu a intru de su 31.03.2022;
- sa scheda de saludi (allegau B)
- sa decraratzioni sostitutiva (allegau D) de s’atu de notoriedadi chi cumprovit is atras intradas chi su benefitziàriu at tentu in su 2021 de penztionis de assistèntzia, o atrus agiudus sòtziu-sanitàrius, tzertificaus de pentzioni de invalididadi o de acumpangiamentu;
- sa scheda sotziali (allegau C) de aprontai a manus de pari cun s’ufìtziu de is Servìtzius Sotzialis de su Comunu;
- sa tzertificatzioni ISEE de su nùcleu familiari chi balit finsas a su 31.12.2021.
Est pretzisu a nai ca si totu custus documentus no arribant a s’Ufìtziu de is Servìtzius Sotzialis a intru de sa dii stabilia (su 28 de friàrgiu de su 2022) no at a fai a cuncordai su pranu personalizau comenti disponit sa Lei 162/98.
Po totu is atrus informus fait a tzerriai a s’Ufìtziu de is Servìtzius Sotzialis de su Comunu de Simaghis su lunis, su mèrcuris e sa cenàbura de is 10.30 a is 13.30 -Tel 0783.4069204. In su giassu istitutzionali de su comunu de Simaghis s’agatant publicaus su mòdulu po presentai sa domanda e totu is atrus allegaus.