Regione Sardegna
Su comunu de Ollasta e de Siapicia, a cuncòrdiu cun su Dirigenti de s’Istitutu cumprensivu, ant cuncordadu po giòbia 27 de gennàrgiu una averiguadura cun tamponis lestrus antigènicus po totu is studiantis de is scolas de sa bidda. Po fai is tamponis non si pagat nudda ma sunt a càrrigu de su comunu. Est pretzisu a nai ca no est òbligu a fai su tamponi, fait a sceberai de ddu fai o nou, ma diat a essi mellus a ddu fai ca sunt crescendi meda is contàgius me in is biddas e in totu sa provìntzia, intra de is mannus e de is piciocheddus puru. Po fai su test tocat a portai sa tèssera sanitària, a compilai su mòdulu de dèlega e a giai su cunsensu informau. Is pipius depint essi acumpangiaus de unu de is genitoris o de unu familiari issoru chi tèngiat is 18 annus fatus. S’arresurtau de su test ddu giant a pustis de pagus minutus. Sa scola s’at a incurai de arregolli is adesionis e de giai is mòdulus po sa delega e su cunsensu informau.
Me in Siapicia: podint fai su test totu is studiantis de sa scola primària de Siapicia (cussus chi sunt residentis in atru comunu puru) giòbia 27 de gennàrgiu 2022 a merii, de is 14.30 a is 15.45, me in sa potecaria de Siamanna, me in bia Sardegna.
Me in Ollasta: podint fai su test totu is studiantis de sa scola de Ollasta, giòbia 27 de gennàrgiu 2022 de is 08:30 me in is localis de sa palestra de sa scola mèdia.