Regione Sardegna
De su 1 de gennàrgiu de su 2022 is famìllias cun fìgius piticus a càrrigu (e finsas a is 21 annus) podint fai domanda po arriciri s’Assènniu Ùnicu Universali.
S’assènniu unicu universali est un agiudu in dinai chi si giait a is famìllias po dònnia fìgiu a càrrigu finsas a candu fait is 21 annus. Su tantu de dinai chi spetat mudat cunformas a su rèdditu de su nùcleu familiari, in basi a s’ISEE chi si presentat candu si fait sa domanda, ponendi in contu s’edadi, su nùmeru de is fìgius e si nci sunt fìgius disàbilis.
Ddi nant assènniu ùnicu poita ca sa punna est cussa de ponni totu paris is agiudus po favoressi is famìllias e cussus po candu nascint pipius, e universali ca, mancari siat diferenti su tanti de dinai chi spetat, si giait a totu is famìllias cun fìgius piticus a càrrigu, finsas si no presentant s’ISEE o si tenint un’ISEE chi propassat is cuaranta milla èurus.
Comenti fai a presentai sa domanda:
- Tocat a intrai a su giassu inps.it a su servìtziu “Assènniu ùnicu e universali po is fìgius a càrrigu” cun su SPID assumancus de livellu 2, carta de identidadi eletrònica 3.0 (CIE) o Carta Natzionali de is servìtzius (CNS);
- Fait a tzerriai su nùmeru birdi 803.164 (chi est gratis tzerriendi de sa reti fissa) o su nùmeru 06 164.164 (de su telefoneddu, cun sa tarifa de su gestori telefònicu)
- Cun is patronaus, po mesu de is servìtzius telemàticus chi ponint a disponimentu gratis issus e totu
A chini pigat su rèdditu de tzitadinàntzia s’assènniu ùnicu ddi spetat de ufìtziu sena de abisòngiu de fai domanda. In su canali you tube de s’INPS fait a castiai unu vìdeu tutorial chi fait a cumprendi beni comenti fait a fai sa domanda.
Po totu is àterus informus in contu de s’Assènniu ùnicu universali fait a ligi innoi.