Regione Sardegna
Cun sa punna de promovi una manera noa de contai sa Sardìnnia in su mundu de sa comunicatzioni e in is mèdius traditzionalis, est nàscia RTS, Ràdiu Televisione Sarda. Una televisioni comunitària, chi tenit un’interessu mannu po sa cultura, po svilupai, contivigiai e amparai sa cultura e s’identidadi linguìstica de sa Sardìnnia. De immoi RTS (Ràdiu Televisioni Sarda) s’agatat in su canali regionali 79 de su digitali terrestri, (su sinnali si pigat a definitzioni arta in su 98% de su territòriu regionali). Sunt in programma in RTS prus de 30 format originalis chi pertocant s' archeologia, sa literadura, is museus, sa mùsica, sa cultura populare e s'intratenimentu, custus format sunt promòvius de is domus de produtzioni sardas prus mannas. A un’ala su progetu de RTS sighit su chi previdit sa Lei regionali 22/2018 in contu de is normas de sa polìtica linguìstica, a s’àtera ala (gràtzias a s’esperièntzia fata cun sa webtv EjaTV, su primu web tv de is lìnguas de Sardìnia) at fatu unu investimentu tecnològicu mannu chi ponit a canta a su digitali terrestri is cumpetèntzias de su setori streaming e de sa comunicatzioni digitali. Ma sa cosa prus de importu de RTS est ca est arrennèscia a traballai ponendi in pei unu progetu mannu cun totu is aziendas prus de importu de s’ìsula e is entis localis. RTS diat a bolli diventai una sotziedadi pùblica, unu tzentru de comunicatzioni de totu is comunidadis de s’ìsula, una televisioni chi ndi potzat bogai a pillu una immàgini positiva de sa Sardìnnia, innui is elementus de annoadura digitali e culturali siant sa sighidura naturali de is traditzionis prus mannas chi sunt bias e beni allogadas in is comunidadis localis.
a.f.