Regione Sardegna
Is arresursas culturalis sunt una oportunidadi manna po fai cresci e svilupai su territòriu. Formazione Cultura Under35 est su nòmini de su programma de formatzioni chi Sa Regioni Sardìnnia, a manus de pari cun sa Fondazione Scuola dei beni e delle attività culturali, at cuncordau po su contivìgiu e sa gestioni de su patrimòniu culturali.
Unu cursu de formatzioni pensau po is professionistas de su patrimòniu culturali de oi e de cras, po spraxi in dònnia logu sa sensibilidadi e po pigai cussèntzia de s’importu mannu chi su patrimòniu culturali tenit in sa vida econòmica e sotziali de unu territòriu, de is dinàmicas de su svilupu territoriali a basi culturali, cun sa punna chi is arresurtaus si fatzant a biri e sigant in su tempus benidori.
Est unu cursu gratis, destinau a formai 2.000 giòvanus chi tenint tra is 18 e is 35 annus chi sunt residentis, bivint, studiant o traballant in Sardìnnia:
- amministradoris de Entis Localis;
- professionistas de su setori culturali (lìberus professionistas, titularis e operadoris de impresa, dipendentis pùblicus o privaus);
- studiantis (de s’Universidadi, de sa Formatzioni arta artìsticu-musicali, de Istitutus Tènnicus Superioris);
- giòvanus sena de traballu o in circa de traballu (chi tenint praxeri a traballai in su setori culturali).
S’oferta formativa est partzia in tres diferentis cursus temàticus a scèberu:
- comunicatzioni de su patrimòniu culturali;
- ainas digitalis po su patrimòniu culturali;
- patrimòniu culturali e crèscida de su territòriu.
In custus cursus, is dischentis ant a tenni modu de imparai a connosci is atoris, is ruolus e is funtzionis de s’ecosistema cultura, cali sunti s ainas e is mètudus po traballai in su setori de su patrimòniu culturali, comenti fai a traballai in rete cun atrus professionistas de su setori po avalorai e amparai su patrimòniu culturali.
De su 10 de nadali a su 31 de su mesi de gennàrgiu 2022 fait a si scriri a su cursu. Is cursus ant a cumintzai in su mesi de martzu de su 2022. Is iscritus ant a podi sceberai de sighiri is letzionis, is laboratòrius e is cursus multimedialis o totu a distàntzia o unu pagu a distàntzia e unu pagu in presèntzia (in sa manera chi in lìngua inglesa si narat modalità blended).
Po totu is informus chi pertocant su programma e comenti si nci scriri fait a intrai a https://www.fondazionescuolapatrimonio.it/offerta-formativa/regione-sardegna-cultura-under-35/