Regione Sardegna
Su Consillu Natzionali de is Giòvanus, in s’àmbitu de is Stadus generalis de su Turismu, at cuncordau su bandu po su cuncursu #promuoviAMOci, abertu a is giòvanus de totu Itàlia, chi tenint de is 16 e is 30 annus, chi bolint fai vìdeus o fotografias po fai a connosci is bellesas de is territòrius insoru, giadendi atentu su prus a is òperas architetònicas, òperas de arti, giassus archeològicus pagu connotus, produtus de s’artesanau e de s’enogastonomia chi contant sa traditzioni, sa cultura e s’identidadi italiana. Custa initziativa nascit po fai a connosci e promovi unu de is setoris chi at tentu prus dannu econòmicu po mori de sa pandemia.
Sa punna est cussa de atirai is giòvanus, avalorendi su talentu e sa creatividadi insoru, e de fai a manera chi fatzant cresci su territòriu giadendi una manu de agiudu a avalorai is bellesas architetònicas, artisticas e archeològicas pagu connotas e su mellus de s'artesanau e de s' enogastonomia de is territòrius nostus.
Totu is chi bolint pigai parti a su cuncursu depint mandai una fotografia o unu vìdeu po promovi e avalorai is bellesas de is territòrius insoru, de is òperas architetònicas, artìsticas e archeològicas prus pagu connotas e de is produtus de s’artesanau e su mellus de s' enogastronomia.
Su Consillu Natzionali de is Giòvanus at a sceberai unu comitau de seletzioni chi at a seletzionai is bincidoris valutendi a parti is vìdeus e is fotografias e at a fai duus classificas diferentis.
Su primu classificau in sa categoria “Fotografia” at a binci unu cursu de fotografia de 20 oras po una persona; su primu classificau in sa categoria “Vìdeu” at a binci unu cursu de vìdeu "Editings Advanced" de 20 oras po una persona.
Is fotografias e is vìdeus chi at a mandai chini pigat parti a su cuncursu bolint mandaus paris a sa liberatòria e a sa scheda de partetzipatzioni firmadas e depint arribai a su Consillu Natzionali de is Giòvanus a intru de is 23.59 de su 11 de abrili de su 2021.
Totu is àterus informus fait a ddus domandai tzerriendi a custu nùmeru 06/94523417 oghinou scriendi a custu indiritzu e-mail Questo indirizzo email è protetto dagli spambots. È necessario abilitare JavaScript per vederlo..
De innoi fait a ndi scarrigai su Regulamentu, sa scheda de adesioni e sa liberatòria po pigai parti a su cuncursu. (a.f.)