Regione Sardegna
Su Presidenti de sa Regioni Solinas at firmau s’ordinàntzia n.10 chi perlongat is disponimentus chi previdiant s’òbrigu de fai su tamponi lestru comenti si ponit pei me in Sardìnnia. S’ordinàntzia, bessia eriseru a noti, àteru no est si no sa pròroga finsas a su 6 de abrili de s’ordinàntzia n. 5 de su 5 de martzu 2021 chi fiat dèpia scadiri in dii de oi.
Is chi ponint pei me in Sardìnnia chi non sunt giai vatzinaus e no ant fatu mancu su tamponi (chi est arresurtau negativu) assumancus 48 oras in antis de partiri, comenti arribant depint fai una de custas tres cosas:
- S’acostai luegus a is giassus, chi ant assentau me in is portus e aeroportus, innui sunt fendi is tamponis lestrus po si ddu fai (s’in casu su tamponi bessit positivu partit luegus totu su protocollu contra de sa Covid previdiu de sa lei).
- Fai su tamponi a intru de 48 oras de s’arribu a s’ìsula, in una strutura pùblica o privada paghendi.si.ddu de busciaca.
- Abarrai a sa sola in domu (isulamentu fidutziàriu) po 10 diis.
S’Assessorau a sa sanidadi in acòrdiu cun is sotziedadis chi spòddiant totu su chi pertocat is trasportus aèreus e marìtimus s’at a incurai chi totu is disponimentus siant arrespetaus.
Est òbrigu po totu is chi biagiant de s’allistai in antis de partiri me in sa setzioni “Nuovo coronavirus” in sa pàgina printzipali de su giassu istitutzionali de sa regioni o po mesu de s’App “Sardegna sicura” chi fait a ndi scarrigai po is sistemas operativus Ios e Android de is telefoneddus.
Po mesu de sa pròpiu prataforma is biagiadoris ant a podi cumprobai de ai fatu su vatzinu (totu de is duas dosis) o de ai fatu su tamponi chi est arresurtau negativu. (a.f.)