Regione Sardegna
S’Assessorau a s’Istrutzioni at publicau s’abisu "ALTRI PRO.DI.GI." (Progetus po parai fronti a sa sperdidura de is giòvanus) chi previdit de presentai progetus studiaus aposta po is giòvanus, cun sa punna de parai fronti a sa sperdidura scolàstica de is piciocheddus chi s’agatant in cunditzionis de dificultadi.
Sa punna de s’abisu est cussa de giai un’agiudu cuncretu a is studiantis chi faint parti de famìllias sbantaxadas. Si diant a bolli giai a custus giòvanus, de una parti, cussas cumpetèntzias chi ddis mancant e chi ddis abisongiant po no diis fai lassai sa scola in antis de su tempus e, de s’àtera parti, si diat a bolli fai diventai sa scola unu logu a innui andai cun praxeri, avalorendi s’arrolu cosa sua, chi podit essi cussu de agiudai a is giòvanus po chi no siant postus a una parti me in sa sotziedadi.
Is chi podint presentai progetus sunt is Entis de su de tres setoris (ETS):
- Organizatzionis de voluntariau
- Assòtzius de promotzioni sotziali
- Sotziedadis de mutu sucursu
- Impresas sotzialis, finsas cun is cooperativas sotzialis e is Cunsòrtzius insoru
Sunt ammìtius is Assòtzius Temporàneus cun Scopu (ATS) – cussus giai formaus o chi sunt formendi.si- intra de is ETS giai nominaus.
Is progetus sunt diretus a is studiantis de is autonomias scolàsticas statalis sardas chi s’agatant in una cunditzioni de sbantaxu po cunditzionis fìsicas, psìchicas, econòmicas, sotzialis e/o familiaris. Is studiantis chi sunt ammìtius sunt cussus chi frecuentant is autonomias scolàsticas statalis de sa Sardìnnia, innui ddoi sunt insenniamentus de su Primu e de su Segundu tziclu. Non sunt ammìtius is studiantis chi frecuentant su CPIA.
Donniunu de is ETS podit presentai una proposta de progetu sceti. Is progetus depint durai assumancus 3 mesis e non prus de 9 mesis.
Dònnia progetu no depit pigai in càrrigu prus pagu de 15 studiantis, acrarendi is metodologias, is ainas chi at a impreai, ita genia de classificatzioni e de controllu de is arresurtaus at a fai. Su progetu depit acabai a intru, e no a pustis, de su 31 de nadali de su 2022 francu perlongamentus de sa Regioni.
Su Dossier de Candidadura telemàticu (DCT) bolit mandau sceti po mesu de sa prataforma online SIL posta a disponimentu cun is servìtzius online de Sardegnalavoro.it
At a bessiri de imoi a pagu tempus un’abisu po fai a sciri sa data de candu aberit e de candu serrat sa prataforma SIL. (a.f.)