Regione Sardegna
De oi sa Sardìnnia est torrada in colori de aràngiu. Dd’at stabiliu s’ordinàntzia chi at firmau su Ministru de sa Saludi Roberto Speranza. Difatis me in sa cida de su 8 a su 14 de martzu s’ìnditzi Rt est artziau lompendi a su 1.8 e custu bolit nai ca s’arriscu de si ndi piscai su virus est immoi prus mannu de innantis. Sa Sardìnnia est passada in deretura de su essi bianca a su essi in colori de aràngiu po mori de su decretu Covid chi at suspèndiu sa zona groga, assumancus finsas a su 6 de abrili, cun sa punna de no nci fai artziai is contàgius pròpiu in su tempus chi diat a essi prus arriscosu: su de is festas de Pasca manna. Su decretu at previdiu dispositzionis prus grais po sa dii de Pasca manna e po is diis a canta. Su 3, su 4, su 5 e su 6 de abrili ant a essi “diis arrùbias” me in totu su territòriu natzionali!
A torrai a essi in zona in colori aràngiu po is sardus bolit nai a si scaresci de su pagheddu chi podiant fai in zona bianca.
Tocat a torrai a pigai in manus e, prus che àteru, a arrespetai totu is disponimentus previdius po sa zona in colori de aràngiu (disponimentus agiumai scarèscius in is ùrtimas cidas).
Sa Regioni no est de acòrdiu cun custa detzisioni chi at pigau su Guvernu e bolit fai a intendi is arrexonis suas me in is logus giustus.
A dònnia modu, po custas 15 diis imbenientis, balint totu is disponimentus e is arrègulas stabilias po is Regionis classificadas in colori de aràngiu. Arregordaus a totus ita podeus e ita non podeus fai:
- TRANSIDURAS
Fait a bessiri de is 05.00 de mangianu a is 10.00 de noti in su matessi Comunu. Si podit lompi sceti una borta a sa dii, aintru de is 5.00 de mangianu e is 10.00 de noti, in su matessi Comunu, a domu de parentis o amigus, in non prus de duas personas, e cun is fillus (si tenint prus pagu de 14 annus) o is cunviventis chi non sunt autosufitzientis.
In custas diis fait a movi de is Comunus de non prus de 5.000 bividoris po lompi sceti a cussus chi non sunt prus a tesu de 30 chilòmetrus, francu a is cabulogus de provìntzia a innui non fait a andai.
Fait a andai a àteras biddas po motivus de traballu, saludi, apretu mannu o po servìtzius chi no s’agatant me in sa pròpiu bidda. No fait a bessiri de is 10.00 de noti a is 05.00 de mangianu francu chi non siat po motivus de traballu, saludi o apretu. Donniunu podit torrai sèmpiri a su domitzìliu, residèntzia o domu cosa sua.
- TZENTRUS CUMMERTZIALIS
Is tzentrus cummertzialis abarrant serraus in is diis de festa e in cussus innantis, francu is butegas de alimentari, supermercaus, potecarias e parapotecarias, stangus, edìculas, librerias e vivàius chi sunt a intru de innia.
- SCOLAS
Didàtica in presèntzia a su 100% in is scolas de sa pipiesa, scolas elementaris e scolas mèdias. In is scolas mannas didàtica in presèntzia a su mancus po su 50% e finsas a su 75% de is studiantis.
Is universidadis ant a abarrai abertas o serradas (cunforma a cantu ant a stabili in autonomia) e a tenori de s’andamentu de s’epidemia.
- TRASPORTU PÙBLICU LOCALI
Mezus prenus a su 50% po su trasportu pùblicu locali francu is mezus chi faint servìtziu po sa scola.
- RISTORATZIONI
Non fait a papai a intru de is tzilleris e ristorantis ne in foras de inguni. De is 05.00 de mangianu a is 06.00 de merii fait a ndi pigai de is localis cosa a papai e a bufai de nci portai a domu. De is 06.00 de merii a is 10.00 de noti sceti de cussus localis cun coxina. Po cunsinniai cosa a papai in deretura a domu non ddoi at restritzionis de oràriu. Non fait a si frimai a papai o a bufai me in su caminu o in is parcus de is 6.00 de merii a is 5.00 de mangianu.
- TEMPUS LÌBERU
Sunt abertus is tzentrus sportivus. Abarrant serradas is palestras, piscinas, mostras, museus, tzìnemas e tiatrus.
- GIOGU
Sunt suspèndias is atividadis de salas de giogus, scumissas, bingo, slot machine finsas a intru de is tzilleris e de is stangus. (a.f.)
Po ndi sciri de prus e essi sèmpiri beni informaus fait a intra a su giassu istitutzionali de su Guvernu