Regione Sardegna
Sunt acabadas eriseru a merii is diis de sa campànnia de preventzioni contra de sa Covid, cuncordada de su Comunu, po sa populatzioni simaghesa.
S’amministratzioni comunali est prexiada meda de fai a sciri ca totu is tamponis fatus sunt bessius NEGATIVUS. Is tamponis fiant 154 in sa dii de martis e 143 eriseru, agiumai 300 in totu.
S’amministratzioni torrat gràtzias a chini totu at giau una manu de agiudu po s’organizatzioni e po sa bona arrennèscida de custa campànnia de preventzioni:
a s’ofìtziu de is servìtzius sotzialis de su Comunu de Simaghis,
a is infermieras de s’ATS de Aristanis,
a s’SVS de Simaghis,
a sa cumpangia barracellari de Simaghis,
a s’Unioni de is Comunus de sa Baddi Bàscia de su Tirsu e de su Grìghini;
e bolit nai gràtzias de coru a totu is chi ant pigau parti a custa initziativa cun sensu tzìvicu e de responsabilidadi:
a is studiantis e a is mammas e babbus insorus,
a is insenniantis e a su personali de sa scola,
a is simaghesus e simaghesas chi sunt lòmpius a fai su tamponi de voluntadi insoru.
Tocat a sighiri ancora a arrespetai is arrègulas po su beni e sa saludi de donniunu de nosu e de totu sa comunidadi manna. (a.f.)