Regione Sardegna
Sa Regioni frimat is chi arribant a s’ìsula, francu chi no siat po chistionis de traballu, apretu o saludi. Ariseru a merii su Presidenti Christian Solinas at firmau un’ordinàntzia noa a manera de amparai sa Sardìnnia po chi su virus de sa Covid-19 no si torrit a spraxi.
Est s’0rdinàntzia n.9 de su 17 de martzu de su 2021, chi narat:
ART.1) S’arribu a sa Sardìnnia cun sa punna de andai a is domus chi siant diversas de sa printzipali (est a nai sa de duus domus) po is chi no sunt residentis me in s’ìsula, est permìtia sceti po chistionis de traballu, de apretu o de saludi chi fait a documentai e, comenti si siat, cunforma a su chi narat s’ordinàntzia regionali n.5/2021.
ART.2) Is vetoris e is armadoris:
in antis de imbarcai a sa genti arretirant e cuntrollant, a prus de su documentu de arricidura de comenti su passigeru s’est arregistrau in s’app “Sardegna Sicura” (cunforma a s’art.1 de s’ordinàntzia n.5/2021), totu is documentus chi cumprobant is rechisitus cunforma a su DPCM de su 2 de martzu de su 2021 po su chi pertocat is transiduras de is Regionis innui si bivit e cunforma a s’art. 1 de custa ordinàntzia etotu;
proibint de s’imbarcai in casu chi custa documentatzioni no siat cumpleta o chi is passigerus no tèngiant is rechisitus giai naus.
ART.3) Is guàrdias de sa forestali e de vigilàntzia ambientali agiudant a su personali sanitàriu de s’ATS in is fainas de cuntrollu de is tzertificaus de vacinadura e in is fainas chi pertocant is tamponis molecularis e antigènicus, cunforma a su chi s’est decrarau me in sa prataforma “Sardegna Sicura” comenti narat s’art.4 de s’ordinàntzia 5/2021.
Sa sotziedadi chi tenit in càrrigu is aeroportus e s’Autoridadi de Sistema Portuali de su Mari de sa Sardìnnia, a manus de pari cun is òrganus statalis cumpetentis, ant a inditai, innui ddoi sunt is sbarcus, is giassus innui s’at a ponni su personali de s’ATS e de su CFVA po spoddiai custas fainas de cuntrollu.
ART.4) Is sìndigus, in calidadi de autoridadis po s’amparu tzivili e sanitàriu, assegurant chi is disponiduras de s’ordinàntzia n.5/2021 siant arrespetadas, cuncordendi fainas de cuntrollu po su chi pertocat sa permanèntzia in domu a intru de is biddas e is tzitadis, cun s’agiudu de sa Politzia locali e de is Cumpangias barracellaris, e ant a mandai is datus chi ant arregotu a sa Sala Operativa Regionali de sa Diretzioni Generali de s’Amparu Tzivili.
Su Corpus Forestali e de Vigilàntzia Ambientali assegurat chi is disponiduras de s’ordinàntzia n.5/2021 siant arrespetadas, cuncordendi fainas de cuntrollu po su chi pertocat sa permanèntzia in domu me in logus de satu e de monti, in logus de mari e in totu is àterus logus chi funt a foras de biddas e tzitadis.
ART.5) Is passigerus chi, cunforma a s’art.4 de s’ordinàntzia n.5/2021, ant fatu su tamponi lestru antigènicu, a sa de cincu diis a pustis de sa dii chi s’est fatu su primu tamponi me in is logus cuncordaus aposta me in is portus e aeroportus, o chi ant fatu su tamponi moleculari a intru de 48 oras de s’intrada a su territòriu regionali, depint comunicai de ai fatu totu su chi tocaiat a fai a mesu de sa prataforma, cunforma a s’art.1 de custa ordinàntzia etotu.
ART.6) Po totu su chi no s’est acrarau in custa ordinàntzia, tocat a pigai in cunsidèriu su DPCM de su 2 de martzu de su 2021 e de is documentus allongiaus a custu etotu.
ART.7) Is disponiduras chi s’agatant in custa ordinàntzia ant a agatai aplicu de su 18 de martzu 2021 e finsas a su 6 de abrili de su 2021, francu su chi est stabiliu in s’art.5 chi at a agatai aplicu de su 23 de martzu de su 2021. (s.m.)