Regione Sardegna
Sunt arresurtaus totus negativus is primus 154 tamponis antigènicus lestrus fatus ariseru a merii me in Simaghis in sa primu dii dedicada a sa preventzioni po parai fronti a sa Covid -19 promòvia de s’amministratzioni comunali de Simaghis, chi tenit a sìndigu Giacomo Obinu.
Otanta de custus test ddus ant fatus a su personali de sa scola e a mammas e babbus de is pipius chi andant a s’àsilu parròchiali, a sa scola de sa pipiesa e a sa primària. Is àterus tamponis ddus ant fatus a is tzitadinus chi si sunt presentaus de voluntadi insoru, chi su Comunu aiat abisau ca ddoi fiat sa possibilidadi de s’aciungi a custa faina de cuntrollu.
Oi est sa de duus diis chi si podint fai is tamponis. At a tocai a is piciocheddus de s’iscola mèdia e de is scolas mannas chi ant giai firmau s’autudecraratzioni. De is 16:00 a is 18:00 ddoi at a essi torra sa possibilidadi de fai su tamponi po totus is tzitadinus voluntàrius de Simaghis.
S’atòbiu, comenti de ariserus etotu, at a essi me in su Tzentru sotziali de sa bidda, innui s’amministratzioni comunali at cuncordau totu a manera de podi fai is test in seguresa, gràtzias finsas a s’agiudu de is dipendentis comunalis, de sa cumpangia barracellari e de s’assòtziu de sucursu de is volontàrius de Simaghis.
Su sìndigu at fatu a sciri ca est cuntentu meda de s’arresurtau poita ca sa populatzioni at cumprèndiu beni s’importu de custa faina e ddoi at pigau parti, diaici totu s’impìnniu e is arresursas postas no ddas ant pèrdias. Sa spera est de tenni su pròpiu arresurtau finsas oi, custu screening est profetosu meda po cumprendi cantu su virus est girendi me in sa bidda. (s.m.)