Regione Sardegna
S’Amministratzioni de Simaghis, a manus de pari cun sa ASL de Aristanis, s’Istitutu Cumprensivu e s’assòtziu SVS de Simaghis, at cuncordau una campànnia contra de sa spraxidura de sa COVID-19, at a fait fai is tamponis antigènicus lestrus. Mancai siaus in zona bianca difatis tocat a ndi gosai cun prus responsabilidadi e a sighiri a donai sèmpiri atentu.
Totu is maistrus de scola e unu de is genitori de is pipius de s’asilu e/o de sa scola elementari ant a podi fai su tamponi a pustis de ai giau s’autorizatzioni e de nci ai torrau su mòdulu firmau a sa scola de su fillu. S’est sceberau de fai su tamponi a unu de is genitoris sceti e no a is pipieddus ca sunt tropu piticus. Is maistrus de scola ant giau una lìtera in deretura a is pipieddus de s’asilu, de sa scola elementari e de sa scola mèdia.
Is piciocheddus de sa scola mèdia, e finsas cussus de is scolas mannas, ant a podit pigai parti a su screening sceti cun s’autorizatzioni de is genitoris insoru. Si domandat, duncas, a is genitoris de firmai su mòdulu alliongiau a sa lìtera po permiti a is fillus insoru de fai su tamponi.
Su sìndigu de Simaghis fait a sciri ca eriseru sunt passaus de domu in domu e ant acabau de giai is lìteras po is studiantis chi frecuentant is scolas mannas e po is genitoris insoru, paris a sa lìtera ddoi est su mòdulu de firmai po giai s’autorizatzioni a pigai parti a sa campànnia de preventzioni contra de sa COVID-19. In chi sunt passaus de domu in domu, po essi segurus chi totus essint arriciu sa lìtera, a unas cantu personas no ddas ant agatadas e dd’ant lassau sa lìtera in sa cascitedda de sa posta.
Is tamponis ddus ant a fai su 16 e su 17 de martzu a merii in su Tzentru Sotziali de Simaghis. Su mòdulu cumpilau e firmau tocat a ddu torrai a intru de cenàbura su 12 de martzu in una de custas maneras:
mandendi.ddu a s’indiritzu de posta eletrònica: Questo indirizzo email è protetto dagli spambots. È necessario abilitare JavaScript per vederlo., oghinou bolit postu a intru de una busta serrada, scriendi a foras “Prenotazione Tampone” e imbucau in sa cascitedda de sa posta chi s’agatat acanta de s’intrada de su Comunu.
Est de importu a ponni su nùmeru de telèfonu o s’indiritzu de posta eletrònica a manera de podi fai a sciri, a totu is interessaus, sa dii e s’ora cuncordada po fai su tamponi.
S’arregordat a totus ca, mancai s’arresurtau de su tamponi bessat negativu, tocat a sighiri a donai atentu poita ca su virus est girendi e est pretzisu a si ponni sa mascheredda, a arrespetai sa distàntzia de assumancus unu mèturu de pari a pari e a si sciacuai fatu fatu is manus. (a.f.)