Regione Sardegna
Ita depit fai chini tenit 80 annus fatus, bivit in provìntzia de Aristanis e bolit fai su vatzinu contra de sa Covid- 19? Dd’at postu in craru sa Assl in una nota. Finsas a su 15 de martzu non ddoi at abisòngiu de telefonai a sa Assl n.5 po si prenotai e nimancu de tzerriai a su Comunu de residèntzia, non tocat mancu (si fait a ddu fai) a s’allistai in su giassu internet po sa campànnia de vacinatzionis de Sa Regioni sarda.
Finalmenti sa Assl de Aristanis at pensau a acrarai is cosas e a ponni in paxi totu cussa genti chi est apistighingiada circhendi a pedra scovocada informus o abetendi chi arribit unu messageddu a su telefoneddu: in unu comunicau fait a sciri ca totu is chi tenint prus de 80 annus “ ant a essi tzerriaus a su telèfonu o in deretura circaus in domu insoru, po ddis fait a sciri candu e a ita ora depint fai su vatzinu, cunforma a su calendàriu chi sa Assl at cuncordau a manus de pari cun su Comunu de residèntzia”.
Non ddoi at perunu arriscu de si prenotai duas bortas o de sballiai - at assegurau sa Assl- po chini, candu arricit sa tzerriada de su Comunu, at giai arriciu finsas su messageddu de sa CUP regionali e s’est giai allistau in su portali de sa regioni non si depit apistighingiai. E “si in s’interis is tzitadinus ant giai fatu su vatzinu in is diis de vacinatzionis cuncordadas in bidda insoru, is operadoris de su CUP nci ddus ant a scantzellai de sa lista e non ddus ant a prenotai un’àtera borta”.
Sa diretora de su Servìtziu de Igieni e Sanidadi pùblica, Maria Valentina Marras, at domandau a totu is sìndigus de is Comunus de sa provìntzia de Aristanis de nci mandai a sa Assl sa lista cun totu is nòminis de is tzitadinus chi ant propassau is 80 annus (est a nai de is chi sunt nascius finsas a su 1941) a s’indiritzu Questo indirizzo email è protetto dagli spambots. È necessario abilitare JavaScript per vederlo..
A pustis de ai arriciu sa lista de is nòminis, su Servìtziu de igieni e sanidadi pùblica de sa Assl de Aristanis s’at a incurai de tzerriai a is sìndigus po cuncordai paris candu s’at a fai sa campànnia de vacinatzioni in su Comunu insoru. At a sighiri a andai a in antis aici in totu su territòriu de sa provìntzia a tenori de is vatzinus chi ant a essi a disponimentu e de is abisòngius organizativus de sa campànnia.
In custa nota cosa sua sa Assl arregordat finsas ca “comenti at fatu a sciri sa Regioni in custas diis passadas, de su 1 de martzu is tzitadinus chi sunt nascius finsas a su 1937 (prus mannus de 85 annus) sunt arricindi unu messàgiu po giai s’adesioni insoru a sa campànnia de vacinatzioni allistendisi in su portali de sa campànnia de vacinatzioni contra de sa Covid-19. Finsas a su 14 de martzu, podint giai s’adesioni insoru sceti is tzitadinus chi ant giai arriciu su sms de invitu”.
“De su 15 de martzu, totu is tzitadinus chi tenint prus de 80 annus (nascius finsas a su 1941) podint giai s’adesioni a sa campànnia de vacinadura, sèmpriri in su pròpiu giassu, mancai no apant arriciu su messageddu. Is tzitadinus chi, in custa manera, ant giau s’adesioni insoru ant a essi tzerriaus de sa segreteria de su CUP e convocaus po fai su vatzinu. Custu at a sutzedi in su pròpiu tempus cun is initziativas localis po fai is vatzinus a is prus mannus de 80 annus cun s’agiudu de is sìndigus e dotoris de mexina generali”.
“A dònnia modu, s’in casu unu no nci siat arrennèsciu a giai s’adesioni in custa manera”- acabat aici sa nota de sa Assl - “de sa primu dii de su mesi de abrili si podit tzerriai a su CUP o si podit fai sa prenotatzioni tzerriendi su nùmeru ùnicu 1533, in oràrius stabilius, chi at a essi ativu su sàbudu e su domìnigu puru, cunforma a is inditus chi ant a essi fatus a sciri a pustis”. (a.f.)