Sa Regioni Sardìnnia est cuncordendi sa Strategia Regionali po su Svilupu Sustenìbili, cunforma a sa Strategia Natzionali po su svilupu sustenìbili, e ddu depit fait castiendi s’Agenda 2030 de s’ONU (Organizatzioni de is natzionis Unias) firmada de 193 natzionis. Totu is guvernus depint pensai a manera integrada a totu is aspetus chi pertocant sa sustenibilidadi sotziali de is comunidadis. S’apretu est cussu de mudai sa manera de biri is cosas e de s’acostai a una bisioni de guvernu integrada. Tocat a ddu fai giadendi atentu a is dinàmicas de su territòriu in totu sa cumplessidadi cosa sua e agatendi caminus de svilupu chi pighint in cunsidèriu is relatas ambientalis, sotzialis, econòmicas e istitutzionalis, avalorendi is arresursas identitàrias de dònnia comunidadi.

Sa Regioni Sardìnnia no si nci bolit fai fuiri custa ocasioni ponendi in pei unu svilupu sustenìbili a manera de bivi beni in dònnia logu. Sa sfida est cussa de agatai obietivus programmàticus po unu tempus longu e de pigai detzisionis chi potzant ponni impari s’amparu de s’ambienti, s’inclusioni sotziali e sa saludi po fai cresci a is personas e a sa comunidadi intrea.

In su mesi de martzu de su 2021 at a inghitzai una fasi noa po cuncordai sa strategia regionali de svilupu sustenìbili: s’at a cumpartziri su traballu cun is istitutzionis localis e sa sotziedadi tzivili e s’ant a podi pigai in cunsidèriu bideas noas de aciungi. Cun sa ghia de sa Regioni Sardìnnia, totus sunt tzerriaus a giai su contributu insoru po cuncordai una Strategia regionali po su svilupu sustenìbili (SRSvS). Sunt giai in programma atòbius meda e laboratòrius de profundamentu.

Su 10 de martzu de su 2021 partit su forum regionali po su svilupu sustenìbili.

Is atòbius chi fiant previdius in presèntzia, po mori de sa pandemia chi seus bivendi, s’ant a fai online cun ainas chi assegurint trasparèntzia, profetu e a manera de ddoi podi pigai parti unu nùmeru prus mannu de genti.

Sa Regioni at a ghiai su forum “Costruiamo insieme Sardegna 2030” mèrcuris, su 10 de martzu de is 9.30 in videucunferèntzia, e at invitau a ddoi pigai parti a totu is istitutzionis de su territòriu: a is rapresentantis de is Comunus, tzitadis metropolitanas, Provìntzias, Unionis de Comunus, Comunidadis montanas, ANCI Sardìnnia, UPI, CAL, Parcus natzionalis e regionalis, arèas marinas protetas, agentzias de svilupu comenti de GAL; FLAG). Fait a si nci iscriri intrendi a innoi.

Totu is agiornamentus ant a essi a disponimentu in custa pàgina e in su calendàriu. (a.f.)