Regione Sardegna
Sa sagra de su sparau est un’apuntamentu oramai sòlitu po sa bidda, ma s’emergèntzia sanitària at firmau custa manifestatzioni, apretziada meda de totus, a sa de 8 editzionis.
Incingiada in su 2012, sa festa si fait dònnia annu in su mesi de martzu o in is primu diis de abrili po saludai s’arribu de su beranu.
Ocannu passau aiant cuncordau sa de 9 editzionis po su 29 de martzu, a pustis dd’aiant transia a su 5 de abrili, pensendi de dda podi fai comenti acabaiat sa serradura fata po parai fronti a sa covid-19. Invècias s’emergèntzia fiat meda prus grai de su chi si podiat pensai e a sa fini ant scantzellau s’editzioni de su 2020 de sa sagra, chi duncas abarrat frimma a su 2019.
Sa festa, dònnia annu, dda cuncordat sa Pro Loco paris cun su Comunu de Biddanoa Truschedu e ddoi acudit sèmpiri genti meda poita ca giait sa possibilidadi de tastai sparau arregotu in su satu acanta de sa bidda e àterus mandiaris tìpicus de su logu, a prus de permiti de bisitai monumentus e giassus archeològicus e de si spassiai cun mùsica e ballus in pratza.
S’ispera est duncas chi custa sagra no si nci sperdat e chi si potzat torrai a fai ocannu chi benit cun sa de 9 editzionis chi seus abetendi giai de duus annus. (s.m.)