Regione Sardegna
Est inghitzau su progetu po s’agiornamentu tecnològicu de sa prataforma Sardegna Digital Library (SDL) po avalorai su patrimòniu culturali e de s’identidadi sarda. Sa Giunta regionali, me in s’ùrtima setziada, at aprovau is lìnias de atzioni po ammelliorai sa prataforma, cun sa punna de ponni a disponimentu de totu sa comunidadi locali, natzionali e internatzionali un’aina sèmpiri a passu cun sa tecnologia, chi potzat avalorai su patrimòniu culturali de sa Sardìnnia in manera moderna.
Antitzipadora de is archìvius digitalis, Sardegna Digital Library de prus de una dexina de annus, est una vetrina de s’identidadi sarda - at nau su Presidenti de sa Regioni Christian Solinas - su tema de s’avaloramentu culturali est unu de is pilastrus de fundamentu de is decraratzionis programmaticas cosa mia, e s’ammodernamentu de custa prataforma, chi de su 2008 contat sa Sardìnnia e fait a connosci in campu digitali is valoris de importu de su patrimòniu culturali sardu, est parti de custu progetu mannu.
Gràtzias a Sardegna Digital Library is tzitadinus sardus tenint a disponimentu unu canali chi arretzit is contributus de is comunidadis e documentus de calidadi chi pertocant s’ìsula nosta, comenti is fundus de s’ISRE, e àterus materialis chi non fiant in s’ìsula agataus me in is archìvius de s’Istitutu LUCE, RAI e Alinari. Unu patrimòniu culturali e identitàriu chi tenit unu valori mannu meda e chi boleus sighiri a amparai e ammanniai” at acabau su Presidenti.
Sa funtzioni de Sardegna Digital Library abarrat cussa de essi unu “strexu” de materiali multimediali fatu e de propiedadi de s’Amministratzioni, non in su setori de is benis culturalis sceti, ma in totu is àterus setoris de s’atividadi amministrativa puru. Sa prataforma me in is annus est stètia mudada, ma solu in parti, po dda adatai a is bisòngius nous de sa comunicatzioni e a is annoaduras tecnològicas, ma no ant mai postu manu finsas a oi a su sistema struturali cosa sua e immoi est netzessàriu a ddu fai. Is tecnologias noas de su web sunt crèscias a sa lestra e sa prataforma immoi est bècia e superada a su puntu chi non si podit prus istentai a ponni in pe unu progetu po dda annoai, avalorai totu is materialis chi tenit, fai a connosci custu materialis e pensai a su materiali nou de su benidori. Difatis su potentziali divulgativu de Sardegna Digital Library est acapiau a istrintu a sa tecnologia chi impreat sa prataforma, e a dii de oi, depit essi adatada a is bisòngius e is oportunidadis de sa sotziedadi, siat po avalorai is arresursas multimedialis chi giai esistint, siat po arregolli is àteras chi ant a arribai a nou, chi contant su patrimòniu identitàriu mannu de sa Sardìnnia. (a.f.)