Regione Sardegna
Est bessia su 28 de friàrgiu s’ordinàntzia n. 4 de sa Regioni: “àteras mesuras straordinàrias e de apretu po parai fronti e fai a mancu de spraxi sa covid-19 in su territòriu regionali de sa Sardìnnia”, su Presidenti Christian Solinas dd’at firmada a intru de noti. In s’ordinàntzia noa s’agatant is disponimentus chi ant a intrai in vigori de sa primu dii de martzu e chi, francu perlongamentus o àteras restritzionis prus grais, ant a balli finsas a su 15 de martzu cunforma a comenti at a essi sa situatzioni in custas duas cidas imbenientis.
Is disponimentus nous stabilius in s’ordinàntzia non balint me in cussus territòrius comunalis sardus innui po mori de sa spraxidura de su virus ddo at giai ordinàntzias sindacalis e restritzionis prus grais de arrespetai.
Sa sfida nosta est cussa de sighiri a mantenni custus arresurtaus e duncas at a tocai a torrai a aberri a bellu a bellu portendi sèmpiri in suta de ogus, dii cun dii e cida cun cida, comenti mudat sa situatzioni e s’ìnditzi Rt.
In s’artìculu n. 4 de s’ordinàntzia su Presidenti narat craru cali at a essi su caminu de sighiri. Cumentzendi de su 1 de martzu e francu chi no nci siant de pigai àterus provedimentus po mori de is arresurtaus de s’andamentu de s’epidemia in territòriu regionali, in Sardìnnia (mancai siat stètia classificada comenti “zona bianca” cun s’ordinàntzia de su ministru de sa saludi de su 28 de friàrgiu 2021, e cunsiderada zona cun un’arriscu bàsciu de si ndi piscai su virus) ant a sighiri a agatai aplicu totu is restritzionis stabilias cunforma a s’art.1, comma 2, de su D.L. n.19 de su 25 de martzu de su 2020 (cunvertiu in Lei n.35 de su 22 de maju de su 2020) francu po totu is disponimentus spetzìficus chi s’agatant in custa ordinàntzia.
Po parai fronti a s’emergèntzia abarrat totunu a in antis su divietu de fai atropèllius de genti, tocat a portai sa mascheredda sèmperi posta me in logus serraus e in foras puru, tocat a arrespetai sa distàntzia de unu metru de pari a pari. Custas arrègulas chi amus imparau beni sighint a balli sèmpiri ca sunt sa cosa prus fàtzili chi donniunu podit fai po su beni suu e po amparai a is àterus!
Is ristorantis ant a abarrai abertus finsas a is 23.00 de noti e is tzilleris finsas a is 21.00. Non s’at a podi bessiri de is 23.30 a is 05.00 de mangianu francu po apretu mannu, traballu e saludi.
Cida chi intrat a tenori de comenti at a essi sa situatzioni s’at a biri si fait torrai a aberri is palestras, scolas de ballu, museus, logus de cultura e is tzentrus cummertzialis in sa coa de cida. (a.f.)