Regione Sardegna
Cunforma a su chi at detzìdiu su ministru de sa Saludi Roberto Speranza, sa Sardìnnia est sa primu regioni, me in Itàlia, a essi classificada comenti de zona bianca po su chi pertocat is provedimentus po parai fronti a s’emergèntzia sanitària de sa covid-19.
Su ministru at giai firmau s’ordinàntzia ponendi in contu is inditus chi ant giau is datus sanitàrius me in s’ìsula, immoi s’at a fai un’atòbiu intra de su ministeru de sa Saludi, s’Iss e sa Regioni po detzidi comenti tocat a fai in pràtica custu passàgiu de sa zona groga a sa zona bianca.
Podit essi chi at a transiri prus a tradu s’oràriu po s’arretirai a de noti, e aici etotu s'ant a ammoddiai àteras limitaduras, in dònnia manera eus a biri totu candu at a bessiri s’ordinànzia noa.
S’assessorau regionali a sa Sanidadi est pensendi, impari cun su ministeru, a una spètzia de “caminu ghidau” a manera chi su prexu mannu no fetzat abbasciai s’atentzioni e portai a unu agravamentu po su chi pertocat sa spraxidura de su virus.
S’at a ponni in pei, duncas, unu pranu po cuntrollai sa situatzioni, sa Regioni e s’Istitutu superiori de sanidadi ant a detzidi po comenti aperri e is oràrius chi s’ant a podi fai in dònnia setori. Dònnia cida s’ant a fai cuntrollus e s’in casu, ddoi ant a essi serraduras cunforma a sa spraxidura de sa covid.
Comenti at nau s’assessori regionali a sa sanidadi Mario Nieddu: at a essi una zona bianca ghidada e cuntrollada, e finsas su Presidenti Solinas at arrecumandau chi no siat motivu po si sbelliai e ca tocat a sighiri a donai atentu, po chi is sacrifìtzius chi is sardus ant fatu in totu custus mesis no torrint a nudda po mori de cumportamentus chi no andant beni. Duncas sa zona bianca no bolit nai a essi sconcaus e sena de responsabilidadi, poita ca de custu podit dipendi sa possibilidadi chi is atividadis produtivas chi in custus mesis ant tentu dannus econòmicus, torrint a traballai in seguresa. Ant a essi afortiaus finsas is cuntrollus po is chi intrant a s’ìsula a manera chi totus, sardus e turistas, potzant girai trancuillus in totu su terrìtoriu regionali. (s.m.)