Regione Sardegna
Is bibliotecas comunalis de s’Unioni rapresentant un’arresursa culturali de importu mannu po su territòriu. In custu tempus de Covid non podent cuncordai atividadis in presèntzia, comenti fadiant primu, ma sunt sèmpiri atentas e prontas a fai a sciri a is tzitadinus, po mesu de is pàgina facebook insoru, is chi sunt is novidadis arribadas me in biblioteca, a giai consillus po ligi, a fai a connosci initziativas culturalis de importu chi, po immoi, si podint sighiri on line sceti.
Po custa cida is bibliotecas ant sinnalau duas initziativas:
Giòbia, su 18 de friàrgiu, a is 17.30 de merii s’U.N.L.A de Aristanis at cuncordau sa presentatzioni de su lìburu de Antoni Pinna “La cura ai tempi del Covid 19” chi si podit sighiri in direta streaming in sa pàgina facebook https://www.facebook.com/centroservizi.culturalioristano/o in su canali youtube de s’U.N.L.A. https://www.youtube.com/channel/UCnNLsBEHrJSWrfK6eBtQaew.
Cenàbura, su 19 de friàrgiu, a is 17.00, s’at a fai me in Casteddu sa presentatzioni de sa ghia bibliogràfica “Nati per leggere, nati per la musica in Sardegna 2021 un anno di storie per bambini”.
Sa direta si podit sighiri in sa pàgina facebook de sa biblioteca de Zrofolliu puru, oghinou in sa pàgina BiblioLive https://bit.ly/3aoKSHR de su giassu internet de su Sistema Bibliotecàriu de Monti Claru de sa Tzitadi Metropolitana de Casteddu.
S’atividadi est a incuru de su Tzentru Regionali de Documentatzioni de is bibliotecas po piciocheddus e de sa Biblioteca metropolitana po is piciocheddus chi ant cuncordau unu grupu de traballu formau de bibliotecàrius, pediatras, meris de librerias e espertus de literadura po sa pipiesa, po apariciai una ghia bibliogràfica fata a moda de calendàriu.
Totu is àterus informus in contu de sa ghia bibliogràfica e de su programma fait a ddus ligi innoi: https://bit.ly/37lo0Hv.
Is bibliotecas de su territòriu sighint a traballai e a assegurai su servìtziu po imprestai lìburus arrespetendi totu su protocollu po parai fronti e non spraxi su virus de sa Covid 19. Po essi sèmpiri agiornaus de is fainas chi cuncordant e consillant, fait a intrai a is pàginas facebook de is bibliotecas comunalis oghinou a cussa de su sistema de is bibliotecas de su Tirsu e Grìghini. (a.f.)