Regione Sardegna
Giai in 64 ofìtzius de sa Posta de totu is 75 chi s’agatant me in sa provìntzia de Aristanis, Poste Italiane at assentau termoscanner po s’assegurai chi is utentis no portint callentura. In antis de intrai a sa sala po su pùblicu dònniunu s’at a depi frimmai pagu pagu po si mesurai sa temperadura, s’in casu siat prus arta de 37.5°no at a fai a intrai a s’ofìtziu. Sa sienda est acabendi de ddus ponni me in is 11 ofìtzius de sa Posta chi abarrant, a intru de custas diis at a cumpletai totu.
A prus de custu, po parai fronti a sa spraxidura de su virus, Poste Italiane at incarrelau finsas unu programma de screening cun tamponis chi giaint s’arresurtau a sa lestra. Ddoi ant giai pigau parti voluntariamenti, po immoi, prus de 100 dipendentis de sa provìntzia intra de is impiegaus de is ofìtzius, is posteris chi nci portant sa posta a is domus e su personali amministativu. Custu screening serbit po agatai, si ddoi sunt, positivus asintomàticus a sa Covid-19 a manera de ndi frimmai sa spraxidura.
Is àteras mesuras chi sunt ativas in totus is ofìtzius de sa Posta de sa provìntzia pertocant s’òbrigu de intrai cun sa mascheredda e a pagu pagu a tenori de sa mannesa de sa sala po su pùblicu; est assegurada sa distàntzia de pari a pari finsas gràtzias a sa sinnalètica aposta; ant pesau trevessas de amparu in plexiglass po chi no intrint a cuntatu operadoris cun utentis; e finsas is operadoris chi arricint su pùblicu depint portai sa mascheredda totu s'ora.
In dònnia manera, sa sienda domandat a su pùblicu de andai a sa Posta po su chi est netzessàriu sceti, ca est mellus a impreai is canalis digitalis a manera de no fai atrumai sa genti. Po unus cantu servìtzius, comenti su de pediri s’identidadi digitali SPID, fait a si pigai un’apuntamentu in cali si siat ofìtziu de sa provìntzia de Aristanis, finsas in is prus piticus e spèrdius, a mesu de una de is app de Poste Italiane (“Ufficio Postale”, “BancoPosta” o “Postepay”) oghinou de su giassu www.poste.it o finsas cun Whatsapp a su nùmeru 371-5003715. (s.m.)