Regione Sardegna
Si fait a sciri a totu is tzitadinus ca est acanta de bessiri, me in sa setzioni de is cuncursus de su giassu de sa Regioni in sa parti dedicada a su traballu, su schema de abisu po su cantieri LavoRas. Is chi sunt interessaus si depint castiai su bandu e a pustis presentai sa domanda po pigai parti a sa seletzioni chi at a spoddiai s’ASPAL.
Su Comunu de Siamanna est circhendi 2 operajus genèricus laureris giorronaderis po ddus pigai a traballai a tempu determinau (8 mesis) po 20 oras a sa cida, pratzidas in cincu diis de traballu, in is cantieris comunalis chi ant a inghitzai a nou.
De su 16 de friàrgiu a su 1 de martzu de su 2021 fait a presentai sa domanda po pigai parti a sa seletzioni cunforma a su chi previdit s’abisu. Sa domanda bolit presentada on line sceti in su giassu www.sardegnalavoro.it, tocat a giai atentu mannu a s’inserimentu de is datus chi pertocant s’ISEE po no perdi puntus chi podint serbiri po artziai me in sa graduatòria de su cantieri.
Podint presentai domanda is disocupaus iscritus a s’ASPAL de cumpetèntzia chi tenint residèntzia o domìtziliu in su Comunu de Siamanna e chi tenint sa patenti B, no ddoi at abbisòngiu de tìtulu de stùdiu. No podit presentai domanda po su pròpiu postu de traballu prus de una persona de su pròpiu nùcleu familiari.
Sa seletzioni at a essi una prova pràtica chi s’at a spoddiai in s’arrespetu de is diretivas po parai fronti a sa spraxidura de sa Covid 19, a intru de 15 diis de sa publicatzioni de sa graduatòria, sa data pretzisa s’at a fai a sciri a totu is interessaus. (s.m.)
Po ndi sciri de prus e po scarrigai totu is documentus chi serbint po partetzipai craca innoi.