Regione Sardegna
Torrat a partiri me in Sardìnnia totu s’iter po fai arreconnosci sa formatzioni autofinantziada, su prus sa chi pertocat s’àmbitu sanitàriu, comenti cussa po operadori sòtziu-sanitàriu (OSS) e po assistenti de stùdiu odontoiàtricu (ASO), ma finsas cussa po si pigai sa cualìfica de pilucheris e estetistas.
Custas fainas formativas, chi ant a aberri arrespetendi totu is protocollus contra de sa Covid-19, sunt de importu mannu po agatai luegus postu de traballu.
S’Assessora a su Traballu, Alessandra Zedda, at acrarau ca tocaiat a fai partiri custus cursus siat po totu is chi si bolint spetzializai po agatai postu de traballu, su prus giòvanus, siat po formai categorias de traballadoris chi potzant agiudai a parai fronti a s’emergèntzia sanitària. Dd’at nau fueddendi de sa determinatzioni de s’Assessorau de su Traballu, Formatzioni e Agiudu sotziali chi fissat sa data ùrtima po mandai is progetus de formatzioni in autofinantziamentu.
A intru de su 9 de trìulas de su 2021, difatis, is Agentzias formativas podint presentai is progetus insorus, ponendi in contu ca no fait a nd’aprovai prus de dexi po donniuna e no fait a fai prus de duas editzionis po dònnia progetu formativu.
S’istrutòria, a printzìpiu, at a sighiri s’òrdini de arribu, is domandas innui ddoi sunt propostas de progetus giai aprovaus in is annus passaus fait a ddas torrai a presentai comenti chi fessint domandas noas. (s.m)