Regione Sardegna
Su sìndigu de Àllai at firmau, su 10 de friàrgiu de su 2021, s’ordinàntzia n.1 po assegurai s’arrespetu de is restritzionis po parai fronti a sa spraxidura de su virus e fai de mancu chi sa genti s’atrumit in is coas de cida de carrasegai, sa giòbia de lardaiolu e su martis de coa. Po sa seguresa e s’òrdini pùblicu bolit pigaus provedimentus po fai de mancu chi si bufit cosa alcòlica me in giassus pùblicus e chi, po mori de sa bufera foras de mesura, si potzat arribai a portai dannu a su patrimòniu pùblicu e privau o a sa saludi e a sa seguresa de is personas.
Pigadas in cunsidèriu custas cosas, su sìndigu giait òrdini chi de is 16.00 de cenàbura e finsas a totu sa dii intrea de su domìnigu, in custus coa de cida:
- su 5, su 6 e su 7 de friàrgiu de su 2021;
- su 12, su 13 e su 14 de friàrgiu de su 2021;
- su 19, su 20 e su 21 de friàrgiu de su 2021;
e po totu sa dii intrea de su 11 de friàrgiu (giòbia de lardaiolu) e de su 15 e 16 de friàrgiu
- est proibiu a bufai o a nci portai cali si siat genia de alcòlicus, de cali si siat gradatzioni, me in is giassus pùblicus o abertus a su pùblicu de totu su territòriu comunali;
- est proibiu a tenni e a nci portai ampuddas de bidru, botus de liàuna o ampuddas de plàstica o cali si siat àteru strexu prenu de cosa alcòlica, de cali si siat gradatzioni, in logus pùblicus o abertus a su pùblicu de totu su territòriu comunali.
Chini no at a arrespetai s’ordinàntzia, francu chi non fetzat reatu prus grai, at a pagai una cuntraventzioni chi de is 25,00 èurus podit lompi finsas a is 500,00 èurus cunforma a s’art.7 bis de su D.L. 267/2000. (a.f.)