Regione Sardegna
Giai de su mesi de gennàrgiu is amministradoris de is Comunus chi sunt in passada de su Tirsu sunt a ogus e origas paradas po chi su frùmini, po mori de totu s’àcua chi at fatu, no inundit su logu.
Po comenti at pròpiu in custas diis e a pustis de s’àcua chi nc’ant bogau de is digas “Eleonora D’Arborea”, me in su territòriu de Busache, e “Pranu Antoni”, me in su territòriu de Fordongianus, est partiu su stadu de vigilàntzia afortiada po su Tirsu. Dd’at comunicau s’Amparu Tzivili Regionali ariserus a mangianu a totu is Comunus chi sunt interessaus.
Mancai s’àcua bogada siat lòmpia a 95 metrus cubus a su segundu, su sìndigu de Fordongianus Serafino Pischedda at nau ca po immoi no tocat a si ponni in pensamentu, poita ca su livellu de s’àcua parit andendi e abasciendi. Sa pròpiu cosa at nau su sìndigu de Sabarussa Mario Tendas, ponendi in craru ca s’Amparu Tzivili at domandau de giai atentu mannu su prus me in sa zona de Bennaxi, tretu tretu de sa baddi de su Tirsu. In sa zona intra de Simaghis e Sabarussa difatis, in su mesi de gennàrgiu su livellu de su Tirsu fiat artu meda, pariat a canta a canta de nci bogai s’unda, po custu tocat a abarrai a ogus abertus. (s.m.)