Regione Sardegna
Est a incumentzai de cras, giòbia s’11 de friàrgiu de su 2021, chi fait a pigai parti a su bandu “Fondo (R)Esisto” po traballadoris e traballadoras cun partida Iva chi tenint sa residèntzia me in Sardìnnia e no giaint traballu a personali dipendenti. Sa punna est cussa de giai agiudus econòmicus a su sistema impenditoriali po aguantai in pei is livellus de ocupatzioni in s’isùla.
“Su de pratzìdi in tres datas diversas is categorias de is chi tenint deretu a fai sa domanda, permitit de ddu fai a manera de tenni prus pagu impedditzus e assegurat a totus de podi partetzipai. Diaici no s’at a carrigai meda su sistema informàticu, comenti est fàtzili chi possat acontessi in is primu oras chi apertint s’Abisu, ma no po mori de is ufìtzius de s’Assessorau”. Custu at nau s’assessora a su traballu Alessandra Zedda chi at fatu a sciri, in una cunferèntzia stampa, ca cras s’at a aberri su bandu po is traballadoris autònomus.
Mancai siat unu bandu a sportellu, finsas is chi no sunt arrennèscius a mandai sa domanda luegus est capatzu chi potzant tenni profetu de su bandu, poita ca ddoi sunt àterus rechisitus puru chi s’ant a pigai in cunsidèriu.
Is domandas bolint presentadas sceti cun sa prataforma posta a disponimentu de sa Regioni a intru de su SIL (sistema informativu de su traballu e de sa formatzioni professionali), a custu indiritzu: www.sardegnalavoro.it, de is 10:00 de s’11 de friàrgiu e finsas a is 23:59 de su 25 de friàrgiu de su 2021. (s.m)