Regione Sardegna
In is diis imbenientis at a inghitzai una cunsìnnia straordinària, cuncordada de is ofìtzius territorialis de s’amparu tzivili regionali a manus de pari cun su personali de s’agentzia Forestas, de 11 millionis e 668 milla maschereddas chirùrgicas e de 26 milla e 170 lìturus de gel disinfetanti po totu is Comunus sardus.
“Sa Regioni est ancora a punta ananti in s’amparu de sa saludi de is tzitadinus e imoi est pronta a giait una frunidura manna po chi is Amministratzionis comunalis de totu sa Sardìnnia potzant sighiri a gestiri s’emergèntzia sanitària - at nau aici su Presidenti de sa Regioni Christian Solinas- Is maschereddas e su gel sunt un’agiudu mannu chi non podit mancai po sighiri a giai is servìtzius essentzialis e sòtziu assistentzialis a totu sa populatzioni, a is tzentrus de is antzianus, a is comunidadis de allògiu, comunidadis integradas e gai sighendi”.
“S’Amparu Tzivili regionali est sèmpiri impinniau e, de candu s’emergèntzia est inghitzada, est sèmpiri traballendi a cuncòrdiu cun is autoridadis sanitàrias, po assigurai de nci portai in totu su territòriu regionali is dispositivus de protetzioni individuali e totu is ainas e su materiali chi abisòngiant po parai fronti a s’emergèntzia, cun sa punna de amparai sa saludi pùblica”, at aciuntu s’Assessori regionali po sa defensa de s’ambienti, Gianni Lampis, chi tenit finsas sa dèlega a s’amparu tzivili. S’Assessori at mandau una lìtera a totu is sìndigus de is Comunus sardus po ddis fai a sciri de custa cunsinnia chi ant a arriciri de imoi a pagu tempus. (a.f.)