Regione Sardegna
A pustis de 15 diis in colori de aràngiu de oi, su 8 de friàrgiu, sa Sardìnnia est torra in zona groga. Duncas fait a andai a is àterus Comunus sardus sena abisòngiu perunu de autotzertificatzioni ma tocat a abarrai in domu de is 22.00 de noti a is 05.00 de mangianu, in custu oràriu fait a bessiri sceti po motivus de saludi, traballu o apretu mannu.
Fait a lompi a un’àtera regioni ma sceti po motivus de saludi, traballu o apretu mannu.
De is 05.00 de mangianu e finsas a is 18.00 de merii fait a papai e a bufai a intru de tzilleris e ristorantis chi, finsas a is 22.00, podint bendi cosa de si nci portai a papai a domu e fai su servìtziu de cunsìnnia a domitzìliu. In is diis de festa e is diis in antis abarrant serradas is butegas chi s’agatant a intru de is tzentrus cummertzialis e mercaus francu is potecarias, parapotecarias, butegas de presìdius sanitàrius, stangus, edìculas e butegas de alimentari.
Torrant a aberri is museus de su lunis a sa cenàbura ma ant a abarrai serraus in sa coa de cida.
Peruna novidadi po tzìnemas e teatrus chi ant a sighiri a abarrai serraus. Sa pròpiu cosa balit po is palestras. Fait a fai atividadi fìsica in dònnia giassu de Sardìnnia ma a sa sola sceti. (a.f.)